Ramil Səfərov Avropa Konvensiyası əsasında qaytarılıb və əfv olunub

Ramil Səfərovun qaytarılması “Məhkum olunmuş şəxslərin verilməsi haqqında” Avropa Konvensiyası əsasında həyata keçirilib. Azərbaycan bu sənədə 2000-ci ildə qoşulub. Bu barədə Prezident Aparatının hüquq-mühafizə orqanları müdiri Fuad Ələsgərov Səfərovun Macarıstandan qaytarılmasını və əfv fərmanı ilə azad edilməsini şərh edərkən bildirib.

Konvensiyada məhkum olunmuş şəxsin cəza çəkməsi üçün başqa ölkəyə verilməsinin şərtləri, bu hüquqi tədbirin həm hökm çıxarmış dövlət, həm də şəxsin verildiyi dövlət üçün nəticələri təsbit olunmuş, müvafiq sorğuların verilməsi və onların cavablandırılması qaydasını tənzimləyən müddəalar öz əksini tapıb. Konvensiyanın müddəalarına əsasən Macarıstanın müvafiq dövlət orqanları ilə əlaqələr qurulub və Ramil Səfərovun Vətənə qaytarılması ilə bağlı intensiv danışıqlar aparılıb. 

Uzun hazırlıq işinin nəticəsi olaraq Azərbaycan Respublikasının Ədliyyə Nazirliyi tərəfindən Macarıstanın Dövlət İdarəetmə və Ədliyyə Nazirliyinə R.Səfərovun ölkəmizə verilməsinin şərtlərini əks etdirən rəsmi sorğu göndərilib. Macarıstandan müsbət cavab alındıqdan dərhal sonra zabitimizin Bakıya gətirilməsinin texniki məsələlərinin həlli üçün işə başlanıb.

Ələkbərovun sözlərinə görə, Ermənistan tərəfin və erməni lobbisinin əvvəldən prosesi siyasiləşdirməsi və zabitin Azərbaycana verilməsinə maneələr törətməsi Səfərovun qaytarılması prosesini çətinləşdirirdi.

Bu zaman Ələkbərov xatırladıb ki, Səfərovun məhkəməsi pozuntularla keçirilib, müdafiə tərəfin istintaqın Səfərovdan yaxşı bilmədiyi rus dilində ifadə aldığı haqqında dəlillər diqqətə alınmayıb.

Səfərovun dərhal əfv edilməsi Avropa Konvensiyasına nə dərəcədə uyğundur?

Bu suala cavabda Ələsgərov qeyd edib ki: ““Məhkum olunmuş şəxslərin verilməsi haqqında” Avropa Konvensiyasının müddəalarına görə bu müqavilənin iştirakçısı olan istənilən dövlət öz Konstitusiyasına, yaxud digər hüquqi aktlarına uyğun olaraq verilmiş şəxsi əfv edə, onun barəsində amnistiya tətbiq edə və cəzasını azalda bilər. Ramil Səfərov artıq cəzasının səkkiz ildən çoxunu çəkib. Azərbaycan Respublikası Konstitusiyasının 109-cu maddəsinin 22-ci bəndinə əsasən onun əfv edilməsi dövlətimizin başçısının müstəsna səlahiyyətidir və prezident böyük humanistlik göstərərək bu səlahiyyətindən istifadə edib”. -06D-