Ermənistan tərəfi Azərbaycan ordusunun Naxçıvanda yüksəklikləri ələ keçirdiyini təsdiq edir

Bakı/09.06.18/Turan: İyunun 8-də Naxçıvan Muxtar Respublikasının "Nuhcihan" dövlət informasiya agentliyi bir ay səssizlikdən və ya qeyri-rəsmi mənbələri şərh etməkdən imtina etdikdən sonra Əlahiddə Ümumqoşun Ordusunun mətbuat xidmətinə istinadən mayın sonlarında hələ 1992-ci ildə işğal edilmiş Şərur rayonunun Günnüt kəndinin azad edildiyi haqqında məlumat yayıb. Həmçinin, Günnüt kəndi ətrafında yerləşən mühüm strateji yüksəkliklər azad edilib.

Xüsusən, Azərbaycan ordusu "Xunut" kəndini, "Ağbulaq" təpəsini, "Qızılqaya" və "Mehridağ" dağlarını azad edərək, daha səmərəli mövqeləri tutub. Həmçinin, Dərələyəzdə Arpa kəndi (erməni versiyasına görə "Areni" nəzarətimiz alına keçib.

Ümumilikdə 11 min hektardan çox ərazi, o cümlədən kənd təsərrüfatı üçün yararlı olan 8 min hektar ərazi Azərbaycan Silahlı Qüvvələrinin nəzarəti altına keçib.

Azad etmə dedikdə, Azərbaycan ordusunun birləşmələrinin "Qızılqaya" dağını (1683 m) tutması başa düşülür, bu, Azərbaycan ordusunun Naxçıvanın 11 ha ərazisinə nəzarət etməsinə imkan verir.

Naxçıvanın Ermənistanla həmsərhəd ərazilərinin müdafiəsi üçün ərazidə 50 km-lik yeni yol çəkilib, habelə ümumilikdə 50 km-dən çox uzunluğu olan yollarda yenidənqurma işləri həyata keçirilib, deyə dövlət agentliyi bildirib.

Yerli sakinlər artıq qohumlarının məzarlarını ziyarət ediblər.

Maydan etibarən dövlət informasiya KİV-ləri susur, jurnalistlərin Naxçıvanda baş verənlər haqqında suallarına cavab vermirdilər. Oradan, həmçinin Yerevandan Azərbaycan ordusunun Naxçıvan ərazisində irəlilədiyi haqqında qısa məlumatlar daxil olurdu.

İyunun 1-də Yerevanın Lragir saytı bu məlumatları təsdiq edərək, yeni müdafiə naziri David Tonoyanın Azərbaycan qoşunlarının Naxçıvanda irəliləməsi haqqında suala cavab verərkən bildirib ki, vəziyyət nəzarət altındadır, risklər səmərəli şəkildə aradan qaldırılır. Azərbaycan öz ərazisində yerdəyişmələr həyata keçirir və hazırda müdaxiləyə, o cümlədən KTMT-nin müdaxiləsinə ehtiyac yoxdur.

Hərbi ekspert Arkadi Qriqoryan isə Azərbaycan tərəfin həqiqətən 1-2 yüksəkliyi ələ keçirdiyini, amma bunun qüvvələrin tarazlığını dəyişdirmədiyini bildirirdi. Belə ki, əsas yüksəkliklər Ermənistan SQ-nin nəzarəti altındadır. O qeyd edib ki, Ermənistan tərəfi də intensiv şəkildə mühəndislik işləri həyata keçirir.

Müdafiə Nazirliyinin mətbuat katibi Arstrun Ovannisyan mayın 20-də Azərbaycan əsgərinin ölümünü şərh edərkən belə deyib: "Azərbaycan SQ sərhədin bəzi hissələrində öz mövqelərini yaxşılaşdırmaq üçün fəal mühəndislik işləri həyata keçirməyə başlayıb".

İyunun 1-də Yerevanın "Yerkramas" saytı məlumat verirdi: Azərbaycan hərbiçiləri həqiqətən öz ərazilərində mühəndislik işləri həyata keçiriblər və üç hissədə öz mövqelərini Ermənistan birləşmələrinin mövqelərinə yaxınlaşdırıblar. Rasm.info saytının iddiasına görə, əvvəllər müəyyən hissələrdə bizim postlarımızla Azərbaycan postları arasında məsafə 5 kilometrə qədər idisə, indi bu məsafə 500-700 metr təşkil edir.

"Azərbaycan ordusunun yeni postları ermənistanın sərhəddəki Areni kəndi üçün müəyyən narahatçılıqlar törədir, şamma yenə qeyd edək: Azərbaycan ordusu heç bir ərazini "azad etməyib", sadəcə olaraq öz torpaqlarında mövqelərini dəyişdirib. Azərbaycan hərbiçilərinin "azad etdiyi" Günnüt kəndi isə Azərbaycan ərazisindədir və 1992-ci ildən boş idi, deyə erməni saytı yazır.

Sosial şəbəkələrdə ermənilər erməni kəndi üzərində Azərbaycanın yeni döyüş postunun ortaya çıxması haqqında məlumatlar və fotoşəkillər yayırlar. Kəndlilər yeni postda növbə çəkən Azərbaycan əsgərlərinin açıq-aşkar müşahidəsi altında yaşamaqdan qorxurlar, deyə müəlliflər facebook-da yazırlar.

May-iyun aylarında Naxçıvanda Azərbaycan və Ermənistan orduları arasında fəal döyüşlər aparılmayıb, müvafiq hərbi əməliyyatlar, canlı qüvvə itkisi haqqında heç bir tərəf məlumat yaymayıb. Deməli, Azərbaycan ordusu neytral zolaqda öz postlarını dəyişdirib, mövqelərini yaxşılaşdırıb və atəş zonasını və ya Azərbaycan və Ermənistan ərazilərinə nəzarət zonasını genişləndirib.

"Regnum" İA-da analitik məqalədən bunun strateji əhəmiyyəti haqqında nəticə çıxarmaq olar:

- Naxçıvanda hal-hazırda ən az bir "Smerç" reaktiv yaylım atəşi sistemi (maksimum atəş məsafəsi 90 km) və müəyyən sayda T-300 Kasırga reaktiv yaylım atəşi sistemi (istifadə olunan raketdən asılı olaraq maksimum atəş məsafəsi 100-120 km) var. Bu xüsusiyyətlər həqiqətən Yerevana atəş açmağa imkan verir. Amma bunun üçün Ermənistan sərhədindən təxminən 20-25 km məsafədə olmaq lazımdır. Ermənistanın bu istiqamətdə üstün yüksəkliklərə malik olduğunu (xüsusən, iki il əvvəl erməni xüsusi təyinatlılarının Naxçıvanın böyük hissəsinin "ovucun içindəki kimi" göründüyü neytral zolağı ələ keçirməsindən sonra) nəzərə alaraq, düşmənin buraxıcı qurğuları tezliklə erməni artilleriyasının cavab zərbəsi altında ola bilər. Bu vəzifə üçün Ermənistan SQ-nin silahları arasında olan 152 mm-lik "Qiatsint-B" topları (maksimum atəş məsafəsi 30 km) və 130 mm-lik M-46 topları (maksimum atəş məsafəsi 27 km) çox uyğundur.

Bu hesabatın maraqlı hissəsi Ermənistan SQ-nin neytral zolaqda mövqelər tutmasının yada salınmasıdır. Yəni Azərbaycan xüsusi təyinatlıları əvvəllər ermənilərin etdiyini edib - döyüşsüz neytral zolaqda mövqelərini yaxşılaşdırıb ki, ordunun Ermənistan ərazilərini əvvəlkindən daha çox atəşə tutmaq imkanına malik olsun. Beləliklə, ərazinin bir hissəsi həqiqətən Azərbaycan əhalisi üçün əlverişli olub, indi Azərbaycan ordusu daha çox ərazini görmək və atəş açmaq imkanına malikdir ki, bu da Ermənistanla mümkün müharibədə çox vacibdir.-0--