Göyçay rayonunun Mırtı kəndinin yüzlərlə sakini polis post-patrul xidmətinin özbaşınalığına etiraz əlaməti olaraq ötən gecəni küçədə keçiriblər.
Yüzlərlə insanın narazılığına axşam saat 11 radələrində post-patrul xidməti avtomobilinin qəbiristanlıqdan qayıdan ər-arvadı saxlaması səbəb olub. Polislər nəzakətsiz bir şəkildə onların kim olduqlarını və niyə gecə saatlarında qəbiristanlıqda gəzdiklərini aydınlaşdırmağa başlayıblar. Ailə Ramazan bayramı ərəfəsində oğullarının məzarını ziyarət etdiyini deyib. Lakin cavab polisləri qane etməyib, onlar kimliyini araşdırmaq üçün ər-arvadı saxlamağı qərara alıb. Polisin hərəkətləri qəzəb doğurub və kənd sakinləri hadisə yerinə toplaşaraq, polislə münaqişəyə giriblər. Sonuncular kömək çağırıblar və bir neçə nəfəri saxlayıblar.
Bundan sonra yüzlərlə kənd sakini toplaşaraq, polis şöbəsinin binası qarşısına gediblər və saxlanılanların azad edilməsini tələb ediblər, oradan Göyçay küçələrində yürüş ediblər və bütün saxlanılanlar azad edildikdən sonra dağılıblar.
“Əhalinin narazılığı polislərin özlərini çox pis aparmasından irəli gəlir. Onlar kəndin girişlərində post qurublar və oraya gəlib-gedən hər kəsdən pul tələb edirlər. Kənd sakinləri bostançılıqla məşğul olur, buraya daim topdan alıcılar gəlirlər, onlar zorla pul alan bu insanların əlindən əziyyət çəkirlər”, deyə adının açıqlanmasını istəməyən yerli sakinlərdən biri Turan agentliyinə bildirib.
O, həmçinin qeyd edib ki, kənd sakinləri dindardır və bu, polisin onları nəzarətdə saxlaması üçün daha bir səbəbdir. Polis səbəbsiz yerə avtomobilləri və ya gəncləri saxlayıb, sənədlərini tələb edir.
Bu nəzarət çoxdan var və polis hakimiyyətdən hədsiz dərəcədə sui-istifadə edərək, vətəndaşların elementar hüquqlarını pozur. Məhz bu əməllər əhalinin polis özbaşınalığına son qoyulması tələbi ilə küçələrə çıxmasına səbəb olub, deyə mənbə qeyd edib.
Avqustun 18-i səhər saatlarında kənddə vəziyyət stabil idi, lakin hakimiyyətin ən fəal şəkildə özbaşınalığa son qoyulmasını tələb edən fəalları həbs etməyə başlayacağı istisna deyil. -02В-
Siyasət
-
Azərbaycan Xarici İşlər Nazirliyi ABŞ Dövlət katibi Antoni Blinkenin Azərbaycan hökumətini insan hüquqlarını müdafiə etdiklərinə görə haqsız yerə həbs edilənləri azad etməyə çağırışı əks olunan bəyanatına cavab verib.
-
ABŞ Dövlət katibi Entoni Blinken Azərbaycanda Vətəndaş Cəmiyyəti və mediaya qarşı təzyiqlərin gücləndirlməsi ilə bağlı bəyanatla çıxış edib.
-
Çərşənbə günü axşam Enter Air aviaşirkətinin çarter reysi Yerevandan Bakıya uçub, Ermənistan KİV Flightradar24 məlumatlarına istinadən bildirib.
-
Çərşənbə günü bir qrup tanınmış futbolçu Bakıya gəlib. Lionel Messi, Luis Suares, Serxio Buskets və Jordi Alba paytaxtın bir sıra ictimai və mədəni obyektlərində olublar, Crystal Hall sarayında futbol həvəskarları ilə görüşdə iştirak ediblər.
Rəy yaz