Hilal Məmmədovun işi üzrə prosesdə qalmaqal (YENİLƏNİB)

Sentyabrın 11-də Bakı Ağır Cinayətlər Məhkəməsində “Tolışi sado” qəzetinin redaktoru Hilal Məmmədovun işi üzrə iclas emosional-gərgin vəziyyətdə keçib. Buna  dövlət ittihamçısı Tural Yusifovun yekun sözü səbəb olub. 

Prokuror bildirib ki, məhkəmə istintaqı üç maddə - dövlətə xəyanət, milli ədavətin qızışdırılması və qanunsuz narkotik maddə üzrə H.Məmmədovun günahını sübut edib.

Prokurorun sözlərinə görə, H. Məmmədov hələ 1992-ci ildə İranın xüsusi xidməti tərəfindən ələ alınıb. Məqsəd Azərbaycanın müstəqilliyinə və ərazi bütövlüyünə zərbə vuran fəaliyyət aparmaq olub. 

İstintaqın məlumatına görə, 1993-cü ilin yayında H.Məmmədov qondarma Talış-Muğan Respublikasının elan edilməsinə yardım göstərib və bu separatçı çıxışdan sonra Sankt-Peterburqa qaçıb.

Prokurorun çıxışına zaldan “yalandır!”, “doğru deyil!” replikaları səslənib. 

H.Məmmədovun Rusiyanın erməni icması ilə əlaqədə olması barədə prokurorun fikirləri müttəhimin tərəfdarlarını özündən çıxarıb. Bütün zal ayağa qalxaraq prokuroru böhtanda və talış xalqını təhqir etməkdə ittiham edib:  “Bu, milli əlamətə görə ayrı-seçkilikdir!”, “Bu, təxribatdır!”, “Bu, Qarabağ müharibəsində həlak olan talışların xatirəsinə hörmətsizlikdir!” H.Məmmədovun tərəfdarlarının qəzəbi o həddə çatıb ki, prokuror zalı tərk etməli olub. H.Məmmədov onları sakitləşməyə çağırıb. Məhkəmə nəzarətçiləri adamları güclə sakitləşdirərək zaldan çıxarıb.

Bundan sonra H.Məmmədovun tərəfdarları zala dəvət olunub və hakim Azər Orucov onları sakit olmağa, prokurorun çıxışını bitirməsinə imkan verməyə çağırıb. Hakim qeyd edib ki, bu, yalnız prokurorun çıxışıdır, qərarı hakimlər qəbul edəcək.

Zaldan “erməni məsələsinin çıxarılması” ilə bağlı tələblər səslənib. Hakim razılaşıb və bu məsələnin çıxarıldığını bildirib.  

Prokuror zala qayıtdıqdan sonra ittihamın qanunsuz narkotik maddəyə aid hissəsi ilə kifayətlənib.  

O, CM-in H.Məmmədovun 274 (dövlətə xəyanət), 283.2.2 (milli, irqi və ya dini düşmənçilik), 234,4.3 (qanunsuz narkotik maddənin hazırlanması, əldə edilməsi, saxlanması, daşınması, göndərilməsi, satışı) maddələri üzrə günahkar bilinməsini istəyib. Bu maddələr müvafiq olaraq 15,3 və 10 il azadlıqdan məhrumetməni nəzərdə tutur.

Lakin yumşaldıcı hallar (alim, ailə başçısı, sağlamlıq durumu, yaş) nəzərə alınmaqla prokuror onun 6 il azadlıqdan məhrum edilməsini istəyib.

Vəkillərin çıxışları sentyabrın 25-nə təyin olunub.

Vəkil Ramiz Mehdiyev prokurorun çıxışı ilə razılaşmayaraq onu absurd adlandırıb. Onun sözlərinə görə, prokuror müdafiə tərəfinin çoxsaylı dəlilərinə münasibət bildirməyib. Vəkil hesab edir ki, məhkəmə bəraət hökmü çıxarmalıdır.

2013 Sentyabr 11 (Çərşənbə) 13:01:37

Bu gün “Tolışi sədo” qəzetinin redaktoru Hilal Məmmədovun işi üzrə prosesdə dövlət ittihamçısı çıxış edib. O, H.Məmmədovun 6 il azadlıqdan məhrum edilməsini istəyib. 

Bu, zalın güclü reaksiyasına səbəb olub, bundan sonra prokuror demək olar ki, məhkəmə zalından qaçıb. 

Proses vəkillərin çıxışları ilə davam edəcək. 

*H.Məmmədov 2012-ci il iyunun 21-də qanunsuz narkotik maddə saxlamaq ittihamı ilə həbs edilib. Sonradan ona qarşı dövlətə xəyanət və milli ədavətin qızışdıırlması ittihamları irəli sürülüb.

Amnesty İnternational onu “vicdan məhbusu” kimi tanıyıb. –16/06D-