Hökumət koronavirusa qarşı mübarizə qərargahı yaradıb

Bakı/28.02.20/Turan: Koronavirusla bağlı risklərin qarşısının alınması, operativ qabaqlayıcı tədbirlərin həyata keçirilməsi məqsədilə Nazirlər Kabineti yanında müvafiq dövlət orqanlarının rəhbərlərindən ibarət qərargah yaradılıb. Bu barədə hökumətin fevralın 27-də yayılmış press-relizində deyilir.

Azərbaycanın bütün ərazisində qabaqlayıcı tədbirlərin görülməsi və monitorinqlərin aparılması üçün mütəxəssislərdən ibarət ekspert qrupu yaradılıb.

Fevralın 28-dən etibarən 994 12 492 41 61, 994 12 492 75 54, 994 12 505 03 30,  994 12 505 13 33 nömrəli "qaynar xətlər" açılıb. Vətəndaşlar bu nömrələrdən onları maraqlandıran suallara cavab ala bilərlər.

"Azərbaycanda sanitar-epidemioloji vəziyyət ciddi nəzarətdədir, hazırda əhali arasında yoluxma halları aşkar edilməmişdir və narahatlıq üçün heç bir əsas yoxdur”, deyə məlumatda bildirilir.

Qərargah İranla sərhəddə nəzarət-buraxılış məntəqələrinin yaxınlığında FHN-in səyyar çadır hospitallarını yaratmaq qərarı qəbul edib. Azərbaycana gələn hər kəs bu hospitallarda ilkin müayinədən keçəcək. Xəstəlik simptomları aşkar edildikdə koronavirus şübhəsi olan şəxslər həkim nəzarəti altında xəstəxanalara yönləndiriləcək .

Azərbaycan Qida Təhlükəsizliyi Agentliyi (AQTA) də koronavirusun yayılmasının qarşısını almaq üçün təxirəsalınmaz tədbirlr görür. AQTA laboratoriyalarında ölkəyə idxal edilən, ölkədən ixrac edilən və ölkədə istehsal edilən ərzağın keyfiyyəti və təhlükəsizliyi yoxlanılır.

Ölkədə epidemioloji və epizootik sabitliyin qorunub saxlanması üçün İnstitutun Mərkəzi Veterinar Laboratoriyası bütün lazımi avadanlıqlar, vasitələr və peşəkar kadrlarla təchiz edilib.

İnfeksion xəstəliklərdən müdafiə və xəstəliklərin yayılmasının qarşısının alınması üçün Agentlik vətəndaşları qida təhlükəsizliyi normalarına riayət etməyə çağırır. -02D-