İctimai xadimlər prezidentin bəyanatına münasibət bildirib: Görüntü xatirinədir

İctimai xadimlər prezident Əliyevin son bəyanatını Turan-a şərh edib. Onların fikrincə, prezidentin dedikləri görüntü yaratmaq üçündür və real həyatda əksini tapmayacaq.

Politoloq Zərdüşt Əlizadə bildirib ki, mövcud durum iqtidarın real həyatla özü arasında qurduğu istehkamları, qala divarlarını, sədləri o qədər yarıb keçir ki, Azərbaycan xalqının həyatından tam təcrid olunmuş neft qaz ticarəti dünyasında yaşayan prezidentimiz artıq öz abstrakt dünyasından çıxıb xalqın real həyatı ilə maraqlanmağa məcbur olur.

“Prezident xalqın həyatından danışarkən nümayiş etdirdi ki, o məsələlərin həllinə, cövhərinə yox, yalnız təzahürlərinə toxuna bilir, onları anlaya bilir”. 

O, prezidentin bəyanatlarının real tədbirlərlə davam etdirilib-etdirilməyəcəyi barədə sualın cavabında deyib: “Əsla. Əminəm ki, bu, yalnız görüntü xatirinədir. Necə ki, bütün Azərbaycanda yalnız neft-qaz pullarının mənimsənilməsindən başqa bütün proseslər görüntü xatirinə edilir. Görüntü xatirinə ordu qurulur, məhkəmələr keçirilir, dövlət idarələri işləyir. Bütün bunların hamısının bircə mənası var, neft-qaz gəlirlərinin bir qrup şəxs tərəfindən mənimsənilməsi. Əminəm ki, indi də cəmiyyəti çox narahat edən iqtisadi, ictimai-siyasi hadisələrin cövhərinə toxunmadan yalnız görüntü yaradırlar. Deyirlər korrupsiyaya qarşı mübarizə aparırlar. Hamıya bəllidir ki, korrupsiyaya qarşı mübarizə aparmırlar. Deyirlər hüquqi dövlət qururuq, amma hamı bildir ki, demokratiyanın qənimi olan hakim zümrə var gücü ilə xalqa qarşı amansız müharibə aparır. Deyirlər biz milli mənafeyi müdafiə edirik, Əkrəm Əylislini tənqid edirik. Əslində bu, ifadə azadlığına boğulması və xalqın diqqətinin qalmaqallı korrupsiya məsələlərindən, seçki prosesindən yayındırılmasıdır”.

O, prezidentin bəyanatlarının həyata keçirilməsi üçün real tədbirlər planından danışarkən deyib ki, plan çox asandır. 

“Prezident təkdir. O, qurduğu piramidanın başında ən müqtədir insandır. İndiyədək Azərbaycan xalqının qarşısında duran problemlərin heç biri həll edilməyib. Bundan sadə nəticə çıxarılmalıdır ki, hakimiyyət problemləri həll edə bilmir. Xalqa müraciət edilməlidir ki, mənə kömək edin. Bunun da çox sadə yolu var. Vətəndaş cəmiyyəti ilə müharibə aparmaq əvəzinə onlara real azadlıq verilməlidir. Onda görün, bu camaat necə daraşar rüşvətxor məmurların, hakimlərin canına. Xalq özü harınlamış, azğınlaşmış, qudurmuş adamları qayda-qanuna itaət etməyə çağırmağa başlayar. Bununla tam qələbə çalınır. Yoxsa, mən özüm rüşvətxor aparatım vasitəsi ilə rüşvətxor məmurları seçirəm, onları rüşvət müqabilində təyin edirəm, onlar rüşvətlərini çıxarmaq üçün xalqı soyub, büdcəni talayırlar, sonra onların balaları təbii ki, haram mal və puldan yeyib qudurur, harınlayır və başlayır soncuqlayıb, xalqa şıllaq atmağa. Bu zaman xalq qəzəblənib iğtişaşlar törədir. Bu zaman mən çıxıb onlara deyirəm, özünüzü yaxşı aparın. Bu, çox məntiqsizdir. Bunun əvəzinə vətəndaş cəmiyyətinə azadlıq versin, mətbuat üzərindən basqıları götürsün və indiyəcən çox həqarətlə baxdıqları jurnalistlər, vətəndaş cəmiyyətinin fəalları, görün o prezidentin qarşıya qoyduğu, həllini bacarmadığı məsələləri cəmi altı aya necə həll edir”.

O, hökumətin indiki addımlarına rişxəndlə belə münasibət bildirib. “Məsəl var, deyərlər, balıq başdan iylənər, amma quyruqdan təmizləyirlər”. 

Şərq-Qərb Araşdırmalar Mərkəzinin rəhbəri Ərəstun Oruclu isə hesab edir ki, Binədə, İsmayıllıda baş verən qarşıdurmalar, yanvarda Bakıda keçirilən etiraz aksiyaları prezidenti münasibət bildirməyə məcbur edib. 

“Amma, mən prezidentin münasibətini effektiv görmədim. Bir tərəfdən İlham Əliyev etiraf etdi ki, onun baş verənlərdən xəbəri var. O bilir ki, məmurları, onların ailə üzvləri vətəndaşları aşağılayır, təhqir edir, alçaldır və hətta qudurğanlıq edirlər kimi ifadə işlətdi. Digər tərəfdən isə prezident bütün bu əməllərə görə xəbərdarlıq etməklə kifayətləndi. Belə göründü ki, əhali sosial şəbəkələrdən deyil, dövlət başçısının özündən  eşitdi ki, bəli bu məsələləri bilir və kimi cəzalandırmaq sırf onun işidir”. 

Politoloqun fikrincə, prezident bu halda müşavirənin gedişi zamanı kimi isə cəzalandırmış olsa idi, cəmiyyətdə xeyli müsbət rəy qazana bilərdi. 

“Yaxın günlərdə də bu baş verərsə, qısa müddətdə olsa da, bu onun imicinə işləyəcək Amma prezidentin çıxışı hələlik cəmiyyətdə neqativ effekt doğurub. Yəni bu barədə susmaq daha yaxşı idi, nəinki bu formada bəyanatla çıxış etmək”, o qeyd edib.-03B-