İlham Əliyev hərbi gücün artırılmasını Azərbaycanın prioritet vəzifəsi elan edib

Hərbi gücün artırılması Azərbaycanın bir nömrəli vəzifəsidir, bu barədə prezident İlham Əliyev bu gün 7-ci çağırış Milli Məclisin birinci iclasında çıxışı zamanı bildirib.

"Birinci nömrəli vəzifə hərbi gücümüzün artırılmasıdır. Baxmayaraq ki, İkinci Qarabağ müharibəsi və antiterror əməliyyatı arxada qaldı, həm dünyada gedən proseslər, yeni münaqişə, müharibə ocaqlarının yaradılması və ətrafımızda gərginliyin artması, eyni zamanda, Ermənistanda revanşizm meyilləri bizi bu sahəyə daim diqqət göstərməyə vadar edir".

Dövlətin digər mühüm vəzifəsi kimi Əliyev işğaldan azad olunmuş torpaqların bərpasını qeyd edib.

"Ancaq biz əgər hərbi sahəyə diqqətimizi azaltsaq və oraya ayrılan vəsaiti lazımi səviyyədə təmin etməsək, gələcəkdə bizi problemlər gözləyə bilər", deyə Əliyev bildirib.

Çünki, onun fikrincə, "Ermənistanda revanşist qüvvələr baş qaldırır".  

"Bu, təkcə marginal siyasi ünsürlər deyil, eyni zamanda, bugünkü Ermənistan hakimiyyəti bu fikirlərlə, bu xülyalarla yaşayır", deyə Əliyev sözünə davam edib.

Prezident qeyd edib ki, Azərbaycanın bütün hərbi zavodlarında genişmiqyaslı modernləşmə işləri aparılır. Onun sözlərinə görə, bu gün Azərbaycan onlarla ölkəyə hərbi sənaye kompleksinin məhsullarını ixrac edir və ildən-ilə bu coğrafiya genişlənir.

Əliyev həmçinin Ermənistanla şərti sərhəddə Azərbaycan ordusunun möhkəmləndiyini bildirib.

"Biz şərti sərhəddə möhkəmlənirik, , çünki hər an Ermənistandan istənilən təxribat gözləmək olar və Ermənistan tərəfi həm kütləvi surətdə silahlanır, eyni zamanda, xarici ölkələrlə, özü də böyük dövlətlərlə hərbi təlimlər keçirir. Ermənistana Qərb ölkələrindən silah, sursat göndərilir", deyə o qeyd edib.

Onun fikrincə, "Ermənistanı bizə qarşı yönəltmək üçün bəzi Qərb dövlətlərinin planları göz qabağındadır”.

O vurğulayıb ki, "müstəqil, prinsipial xarici siyasət bizim əsas istiqamətimizdir".

"Biz heç vaxt heç kimə qarşı heç bir iş görməmişdik, heç kimin işinə qarışmamışdıq. Amma bizim işimizə qarışmaq istəyənlərə də hər dəfə dərs vermişik ki, bunu etməsinlər", deyə dövlət başçısı bildirib.

"Bizimlə ikitərəfli formatda qarşılıqlı hörmət əsasında kim əməkdaşlıq etmək istəyirsə, biz ikiqat əməkdaşlıq edəcəyik.  Amma əgər kimsə hesab edir ki, bizə gəlib nəsə diktə edəcək, yaxud da bizi əsassız olaraq ittiham edəcək, ya da hansısa vasitələrlə bizi qaralayacaq və sanki heç nə olmamış kimi bu ölkələrlə biz dostluq edəcəyik, bu, səhv təsəvvürdür, bu, olmayacaq", deyə prezident qeyd edib.

O, Ermənistanı sülh müqaviləsi ilə bağlı danışıqları uzatmaqda ittiham edib.

"Bu günə qədər - birinci layihəmiz Ermənistana göndəriləndən bu günə qədər 10 şərhlər mübadiləsi olub. ... aylar keçdikcə təbii olaraq biz gözləyirdik ki, Ermənistan öz şərhlərini daha operativ və çevik bizə verəcək. Ancaq biz bunun tam əksini gördük. Son variantın onlardan alınmasını biz 70 gün gözləməli olduq. Bütün razılaşdırılmamış müddəalar onların variantında sülh müqaviləsindən çıxarıldı. Yəni, bu dərəcədə primitiv və qeyri-adekvat addım, sözün düzü, gözlənilən deyildi".

Dövlət başçısı qeyd edib ki, "bir sıra məqamlar Ermənistanın, əslində, sülh istəmədiyini, vaxt uzatmaq istədiyini deməyə əsas verir".