İşçi qrup jurnalist Xədicə İsmayıldan narazıdır

İnsan Haqları üzrə Birgə işçi qrupa daxil olan hüquq müdafiəçiləri cümə günü Qadın Hüquqlarını Müdafiə Cəmiyyətinin ofisində mətbuat konfransı keçirib.

Qrupun üzvü Sahib Məmmədov işçi qrupun fəaliyyətinin bərpasını faydalı adlandırıb. Bu qrupun daha geniş tərkibdə fəaliyyət göstərəcəyi qeyd olunub. Eyni zamanda, qrupa qarşı basqıların olduğu da nəzərə çatdırılıb. Avropa Şurası baş katibinə işçi qrupa etimadsızlıq göstərilməsi ilə bağlı 35 nəfərin imzası ilə göndərilən müraciət bu basqıların göstəricisi sayılıb. Bu təzyiqlərdə jurnalist Xədicə İsmayılın xüsusi rolu olduğu dəfələrlə nəzərə çatdırılıb. Azərbaycan cəmiyyətində işçi qrupa diqqət də, aqressiv münasibət də olduğu vurğulanıb.

Qarşı tərəfi ittiham edən S.Məmmədova görə, onlar məhbus siyahılarında məşhur adların olmasını istəyir, amma bu məhbusların azadlqıda olmalarını istəmir. “Biz bütün məhbusların azadlığa çıxmasını istəyirik və işçi qrup bu yöndə fəaliyyət göstərəcək”, - deyə S.Məmmədov bildirib. S.Məmmədova görə, qarşı tərəfin məqsədi işçi qrupun yaradılmasına imkan verməmək, yaradılırsa, qrupun tərkibində olmaq, bu da olmasa, qrupu gözdən salmaq olub. Onun fikrincə, dünyada “insan haqlarından yararlanan “biznes şəbəkəsi” var. Bu biznes tərəfdarları bununla iri pullar qazanırlar, Azərbaycanda da onun nümayəndələri vardır.

Nəzərdə tutulmasına baxmayaraq, X.İsmayılın işçi qrupa daxil edliməməsi qrupda təmsil edilən 10 nəfərin hər birinin istəyi kimi nəzərə çatdırılıb. Qrup təmsilçilərinə görə, X.İsmayıl qrupun iclası olacaq günün axşamı sosial şəbəkədəki mövqeyilə təxribatçı mövqe sərgiləyib. İşçi qrup belə mövqeyə malik insanla qurum tərkibində işləyə bilməyəcəyini bəyan edib. Amma qrup təmsilçiləri hazırda həbsdə olan hüquq müdafiəçisi Rəsul Cəfərovu, yeri naməlum olan Emin Hüseyni qrupun tərkibində görmək istədiklərini deyiblər. Bunun üçün mübarizənin hələ bitmədiyini nəzərə çatdırıblar.

Həbsdə olan siyasi məhbuslara işçi qrupa etimadsızlıq göstərilməsi haqda məktub yazdırılması da mətbuat konfransında tənqid edilib. Bu etimadsızlığın təşkil edilməsi ən azı əxlaqsızlıq kimi dəyərləndirilib. Amma bütün bu basqılara baxmayaraq, işçi qrupun vəzifəsinin öhdəsindən gələcəyi qeyd edilib. İlin sonuna kimi həbsdə olan hüquq müdafiəçilərinin, QHT sektoru təmsilçilərinin azadlığa buraxılacaqlarına ümidvar olduqlarını deyiblər. “Hansısa məhbuslar işçi qrupdan imtina edə bilərlər, amma biz onların azadlığa çıxmalarından imtina etməyəcəyik”, - deyə Səidə Qocamanlı mövqeyini açqılayıb.

Novella Cəfəroğlu işçi qrupun yaradılmasının heç də asan başa gəlmədiyini deyib. Əgər ölkədə güclü cəmiyyət olsaydı, bu cəmiyyətin xalq kütlələri tərəfindən kifayət qədər dəstəyi olsaydı, bu qrupa ehtiyac olmazdı. Cəmiyyət güclü olmayanda probelmin həlli üçün hakimiyyətlə dialoqa gedilir. N.Cəfəroğlu işçi qrupun hökumətlə bu dialoqun yaradılmasından irəli gəldiyini söyləyib. Belə dialoqun QHT sektoru, media ilə aparılmasının da nəzərdə tutulduğu deyilib.

“Bir də təkrar edirəm ki, güclü vətəndaş cəmiyyəti olsaydı, bu qrupa ehtiyac olmazdı, bir halda kı, belə cəmiyyət yoxdur, o zaman məsələnin həlli üçün dialoqa ehtiyac yaranır”, - deyə N.Cəfəroğlu qrupun yaradılması səbəblərinə aydınlıq gətirib.

Həbsdə olan məhbusları azad etmək üçün bu yol effektli variant adlandırılıb.

“Turan”ın müxbirinin qaldırdığı Naxçıvanda fəaliyyət göstərən hüquq müdafiəçiləri Məlahət və İlqar Nəsibovların məşəqqətlərə məruz qalmaları, Naxçıvandan çıxmalarına yasaq qoyulmaları, məhkəmə prosesi olacağı məsələsinə toxunan N.Cəfəroğlu bu məsələni diqqət mərkzəində saxladıqlarını, məhkəmə ilə bağlı Naxçıvana gedə biləcəklərini ifadə edib. -05C-