Lavrov Ermənistanla Azərbaycan arasında avtomobil hərəkətinin təşkili ilə bağlı ideyalar irəli sürüb

Bakı/23.06.22/Turan: Kommunikasiyaların açılması üzrə üçtərəfli işçi qrupun işində müəyyən irəliləyiş var. Bunu cümə axşamı Rusiyanın xarici işlər naziri Sergey Larov  Bakıda prezident İlham Əliyevlə görüşündə deyib.

“Biz Ermənistan tərəfi ilə razılaşdırılmalı olan məsələləri müzakirə edirik. Süni maneələr yaratmamaq üçün avtomobillərin hərəkətinin ən rahat şəkildə təşkili problemini necə həll etmək barədə ümumi anlayışımız var. Nəticə əldə olunana qədər Rusiya bu işə kömək edəcək. Ümid edirəm ki, bu, tezliklə baş verəcək”, - deyə o bildirib.

Rusiya Azərbaycan və Ermənistan arasında sərhədlərin delimitasiyası və demarkasiyası üzrə komissiyalara məsləhət xidmətləri göstərməyə hazırdır. “Bununla bağlı konkret təkliflər var. Onları sizinlə müzakirə etməkdən şad olaram”, - Lavrov davam edib.

Daha sonra Rusiya xarici işlər naziri qeyd edib ki, Ermənistan tərəfi Azərbaycanın təklif etdiyi gələcək sülh müqaviləsinin müddəalarını müzakirə etməyə hazırdır.

“Biz baş nazir Paşinyanın bu mövzuda danışıqlara hazır olduğunu eşitdik. Biz Azərbaycan və Ermənistanın razılığı ilə yardım göstərməyə hazırıq”, - Lavrov vurğulayıb. -02B-