Londonda Qlobal Media Azadlığı Konfransı

London/11.07.19/Turan: İyulun 10-da Londonda Qlobal Media Azadlığı Konfransı işə başlayıb. Tədbiri Böyük Britaniya və Kanada hökumətləri təşkil edib.

Konfransın leytmotivi bütün dünyada media azadlığının təbliğidir, çünki bu, hər ölkənin iqtisadi inkişafının, sosial rifahının mühüm tərkib hissəsidir.

İfadə azadlığı İnsan Hüquqları üzrə Universal Bəyannamənin 19-cu maddəsində nəzərdə tutulub və hökumətlərin bu öhdəliklərə əməl etməklə bağlı öhdəlikləri var.

Konfransda müxtəlif ölkələrdən bir çox beynəlxalq təşkilatların rəhbərləri, hökümət nümayəndələri, jurnalistlər, hüquq müdafiəçiləri iştirak edirlər, Turan-ın xüsusi müxbiri Londondan məlumat verib.

Konfrans iştirakçıları həyəcan təbili çalaraq jurnalistlərə edilən hücumları dayndırmaq üçün birgə çalışmağın vacibliyini vurğulayıblar.

Çıxışlarda diqqətin yönəldildiyi əsas məqam oldur ki, heç bir jurnalist peşəsinə görə təqib edilməməli və öz həyatını qurban verməməlidir.

Konfransın ilk panellərindən birində ifadə azadlığı ilə bağlı yeni bəyannamənin qəbulu məsələsi müzakirə edilib.

ATƏT-in media azadlığı üzrə nümayəndəsi Harlem Dezir bildirib ki, yeni bəyannamə növbəti media azadlığı ilə bağlı problemlərin həllinə kömək edəcək.

Digər paneldə müzakirələrin mövzusu jurnalistlərin təhlükəsizliyi və müdafiəsi olub.

Kanada XİN rəhbərinin moderatorluğu ilə keçirilən müzakirələrdə "Sərhədsiz Reportyorlar" təşkilatının Böyük Britaniya üzrə nümayəndəsi Rebekka Vinsent çıxış edib.

O qeyd edib ki, jurnalist olmaq indiki qədər təhlükəli olmayıb.

"Hazırda dünyada 340 jurnalist həbsxanadadır", - o bildirib.

"Media azadlığı: jurnalistlər təhlükə altında" mövzusunda müzakirələrdə insan haqqları üzrə vəkil Amal Kluni çıxış edib.

"Biz geriyə gedirik. Son 18 ayda 100 jurnalist öldürülüb. Həbsxanalarda rekord sayda jurnalist var. Jurnalist Camal Kaşıkçı Səudiyyə Ərəbistanının Türkiyədəki səfirliyində işgəncə ilə öldürüldü. Dünya liderləri isə ancaq çiyin çekirlər", - A.Kluni bildirib.

"Mən hüquqi praktikamda jurnalistlərin üzləşdikləri problemlərin şahidi olmuşam. Mən Azərbaycan, Maldiv adaları, Misirdə insan hüquqlarının pozulması, korrupsiya haqda məlumat yaydığına görə öz hökumətləri tərəfindən təqib olunan jurnalistləri təmsil etmişəm. Mənim fondun TrialWatch təşəbbüsü bütün dünyada jurnalistlərin təqib olunmasına nəzarət edir", - o vurğulayıb.

Əsasən A.Klunu AİHM-də azərbaycanlı jurnalist Xədicə İsmayılovanı təmsil edir.

O, 2014-cü ilin dekabrında həbs olunub və iqtisadi cinayətlərdə ittiham edilərək 7,5 azadlıqdan məhrum edilib.

X.İsmayılova Amnesty İnternational təşkilatı tərəfindən "vicdan məhbusu" kimi tanınıb.

2016-cı ilin mayında onun real cəza müddəti şərti cəza ilə əvəzlənib. Bununla belə, onun xarici səfərlərinə qadağa qoyulub, hesabları qapadılıb.

AİHM-də onun işini Amal Kluni və Nani Yansen aparırlar. Onlar hesab edirlər ki, jurnalist Azərbaycanın hakim elitasında korrupsiyanı ifşa etdiyinə görə təqib olunub. -16C-