MDB sammitində İlham Əliyevlə Niko Paşinyan arasında polemika yaranıb

Bakı/11.10.19/Turan: Oktyabrın 11-də Aşqabadda MDB sammitində Azərbaycan və Ermənistan liderləri arasında növbəti polemika yaranıb.

Öncə Azərbaycan prezidenti İlham Əliyev çıxış edərək Ermənistanın yeni hakimiyyətini "Nasistlərin davamçısı Qaregin Njde"nin qəhrəmanlaşdırılmasını pisləyib.

"Ermənistanın keçmiş hakimiyyəti Yerevanın mərkəzində alman faşistlərinə xidmət edən Qaregin Njde ləqəbli faşist cəllad və xəyanətkar Qaregin Ter-Arutyunyana abidə ucaldıb. Təəssüf ki, Ermənistanın yeni hakimiyyəti bu abidəni sökməyib. Hesab edirəm ki, MDB məkanında faşizmin qəhrəmanlaşdırılmasına yer yoxdur" , - İ.Əliyev vurğulayıb.

İ.Əliyev sammitdə müzakirə olunan sənədlə - faşizmin darmadağın edilməsində SSRİ-nin həlledici rolunun tanınması, nasizmin tarixi və qəhrəmanlaşdırılmasının yenidən nəzərdən keçirilməsinin yolverilməzliyi çağırışı ilə MDB ölkələri xalqlarına və dünya birliyinə müraciətlə əlaqədar faşizm mövzusuna toxunub.

Ermənistanın baş naziri Nikol Paşinyan İ.Əliyevin çıxışına reaksiya verərək Azərbaycanı "faktları təhrif etmək cəhdində" ittiham edib.

"İlham Heydəroviçin çıxışından belə təəssürat yaranır ki, Hitler bu müharibədə ikinci dərəcəli rol oynayıb və nasist hərəkatının lideri Qaregin Njde olub. Reallıq budur ki, Qaregin Njde Ermənistanın Türkiyə tərəfindən işğalına qarşı vuruşub, erməni soyqırımına qarşı mübarizə aparıb. Bir daha vurğulamaq istərdim ki, biz tarixin obyektiv qiymətləndirilməsini bilməliyik. Deyirlər ki, Qaregin Njde Vladimir həbsxanasında öldü. Bir çox sovet xadimləri həmin həbsxanada öldülər, Soljenitsın QULAQDA olub. Həqiqətənmi biz düşünürük ki, 37-50-ci illərdə mühakimə olunanların hamısı millət düşmənləridir?", - o deyib.

Sonra Paşinyan deyib ki, Azərbaycan prezidentinin sözləri erməni xalqına, eləcə də bu sammitdə öz ölkələrini və xalqlarını təmsil edən liderlərə hörmətsizlikdir.02D-