Milli Məclis avtoxuliqanlıq və fahişəliyə görə cəzaları sərtləşdirən düzəlişləri təsdiq edir

Milli Məclisin cümə günü keçirilən plenar iclasında deputatlar İnzibati Xətalar Məcəlləsinə dəyişikliklər layihəsini müzakirə və qəbul ediblər.

    Bu dəyişikliklər avtoxuliqanlığa, sürəti aşmağa, maşını sərxoş vəziyyətdə idarə etməyə görə cərimələrin artırılmasını nəzərdə tutur.

    Qəbul edilən düzəlişlərə əsasən, sərxoş vəziyyətdə maşın sürməyə görə 300 manat cərimə və ya 6 aydan 1 ilədək sürücü vəsiqəsindən məhrumetmə cəzası müəyyən ediləcək.

    Sərxoş vəziyyətdə törədilən qəzaya görə sürücü 1 il müddətinə vəsiqəsindən məhrum edilir və ya 400-500 manat cərimə olunur.

    Sərxoş vəziyyətdə təkrarən saxlandığı zaman sürücü 2 il müddətinə vəsiqədən məhrum edilir və ya 400-500 manat cərimə olunur.

    Sürücü üçüncü şəxsə maddi ziyan və ya yüngül bədən xəsarəti yetiribsə, cərimə 700 manat təşkil edəcək.

    Qəbul edilən düzəlişlərə əsasən, sürücü polisin tələblərinə tabe olmaq və ayıqlıq yoxlamasından keçmək məcburiyyətindədir. Sürücü imtina edərsə, 2 il müddətinə sürücü vəsiqəsindən məhrum edilə və ya 200-300 manat cərimə oluna, yaxud 15 gün müddətinə həbs edilə bilər.

    Düzəlişlər həmçinin piyadaların yol hərəkəti qaydalarını pozduqları halda 20-30 manat məbləğində cərimələnməsini nəzərdə tutur.

    Sürücü vəsiqəsi olmadan avtomobilin idarə olunması 500-800 manat cərimə ilə cəzalandırılacaq. Düzəlişlərdə avtoxuliqanlığa görə 1 il ərzində vəsiqədən məhrum edilmə nəzərdə tutulur.

    Düzəlişlər həmçinin fahişəliklə məşğul olmağa görə cərimənin 40 manatdan 80-100 manata qədər artırılmasını nəzərdə tutur. -04C-