Gürcüstan xalqı islahatların davam etdirilməsini seçdi

 Hakimiyyət Azərbayanın ümumavropa demokratik proseslərinə uyğunlaşması prosesinin qarşısını almaq iqtidarında deyil, bu fikri obyektiv.tv-yə müsahibəsində Turan İnformasiya Agentliyinin direktoru Mehman Əliyev bildirib. O, Tbilisidə “Azadlıq, sülh və çiçəklənməyə yardım. Cənubi Qafqaz və Rusiyanın potensial münasibətləri” mövzusunda oktyabrın 30-da keçirilmiş konfransın yekunlarını belə şərh edib.

    Fridrix Naumann Fondu tərəfindən təşkil edilmiş tədbirdə üç Cənubi Qafqaz ölkəsinin Avropa Liberal-Demokrat və İslahat Partiyasına daxil olan partiyalarının – Müsavat, Erməni Ümummilli Hərəkatı, Gürcüstan Respublikaçılar Partiyasının rəhbərləri, habelə Moskvanın Karnegi mərkəzinin və regionun ekspertləri iştirak ediblər.

    Konfrans intensiv keçib – 9 saat ərzində 9 məruzə dinlənilib, müzakirələr isə konstruktiv xarakter daşıyıb. Sentyabrda İstanbulda da analoji görüş keçirilib, burada Türkiyənin MDB və Cənubi Qafqaz üzrə ekspertləri iştirak ediblər.

    Gürcüstanda baş verən hadisələr görüşün əsas xəttini təşkil edib. Əliyevin sözlərinə görə, Gürcüstanda oktyabrın 1-də keçirilən parlament seçkiləri hakimiyyətin sivil şəkildə dəyişməsinə nümunə olub və Gürcüstan xalqının liberal dəyərlərə sadiqliyini nümayiş etdirib. Bu seçkilər 2003-cü il “qızılgül inqilabının” davamı oldu. Bu illər ərzində xalq məişət korrupsiyasının və məmur zorakılığının kəskin şəkildə azalmasının, qanunların işləmə dərəcəsinin artmasının nəticələrini hiss etdi, buna görə də islahatların davam etdirilməsini istədi.

    Gürcüstanda gedən liberal proses Ermənistanda və Azərbaycanda dəstək tapır. Hər yerdə insanlar şəxsi seçim azadlığı, konstitusion haqlarına hörmət istəyirlər. Onlar dövlət tərəfindən sosial, siyasi, iqtisadi və digər növ zorakılıqlara, totalitarizmə və avtoritarizmə qarşıdırlar.

    Tbilisidəki görüşdə ümumilikdə Qafqazda sabitlik layihəsi çərçivəsində Şimali Qafqaz mövzusu xüsusi müzakirə predmeti olub. Rusiyalı ekspertlər etiraf ediblər ki, regionda mürəkkəb proseslər gedir, etnik və islami amillər, iqtisadi və sosial problemlər və mərkəzin Şimali Qafqaz respublikalarına təsirinin zəif olması bu proseslərə təsir göstərir. Moskvalı ekspertlər bildiriblər ki, Kremldə Gürcüstan və digər Cənubi Qafqaz ölkələri ilə konstruktiv dialoqa ehtiyac olduğunu başa düşürlər, belə bir dialoq olmadan regional sabitlik ola bilməz, deyə Əliyev qeyd edib. -0-