Milli Şura AŞPA üzvlərinə müraciət ünvanlayıb

Demokratik Qüvvələrin Milli Şurası (DQMŞ) AŞPA-ya qurumun fəaliyyətinə etiraz ifadə edən müraciət ünvanlayıb. 

Ölkənin AŞ-a üzv olduğu 2001-ci ildən demokratiya ilə bağlı ümidləri bu quruma bağlanıb, insan hüquq və azadlıqları sahəsində etibarlı təminat olacağına gözlənti vardı. Amma gözləntilər nəinki doğrulmadı, əksinə, AŞPA funksional təsisat kimi nüfuzunu itirdi. 2013-cü ilin yanvar sessiyasında Ştrasserin Azərbaycanda siyasi məhbuslarla bağlı qətnaməsinin AŞPA-da qəbul olunmaması xalqın bu instituta inamını azaldıb. “Bu, Ştrasserin yox, AŞPA-nın, ölkənin, insan hüquqlarının məğlubiyyəti idi, avtoritarizmin demokratiya, “kürü” diplomatiyasının Avropa dəyərləri üzərində qələbəsi idi”, deyə müəlliflər qurumun fəaliyyətinə etiraz ifadə edirlər. 

Bu uğursuzluq iqtidarın demokratik düşərgəyə, vətəndaş cəmiyyətinə basqılarını gücləndirib. Siyasi və vicdan məhbuslarının sayı əhəmiyyətli dərəcədə artıb. Ölkədə 140 siyasi və vicdan məhbusu var. Dövlət başçısı İlham Əliyev repressiv davranışını AŞPA-nın mövqeyi ilə əsaslandırır, ölkədə siyasi məhbus olmadığını AŞPA-nın məlum qətnaməyə səs verməməklə təsdiq etdiyini deyir.

Azərbaycanın öhdəliklərinin icrası ilə bağlı qəbul edilən tələblər hələ də kağız üzərində qalır. AŞPA-nın qısamüddətli müşahidəçilər missiyasının son prezident seçkilərini müsbət sayması seçki saxtakarlıqlarının kulminasiyası hesab edilir. Məhkəmə hakimiyyəti ölkədə tamamilə nüfuzunu itirib. Siyasi fəallar, blogerlər, jurnalistlər narkotika, qanunsuz silah, iğtişaş və s. kimi ittihamlarla həbs edilirlər. Fiziki və mənəvi işgəncələrə məruz qalırlar və Avropa Məhkəməsinin qərarları icra olunmur. 

Parlament hakimiyyətinə etimad yox dərəcəsindədir. 2012-ci ilin sentyabrında məşhur “Gülərgate” qalmaqalı ölkə parlamentinin necə formalaşmasına, deputat yerlərini necə, neçəyə və kimlərin satmasına işıq saldı. 

AŞ ilə əməkdaşlığın 14-cü ilində bəzi parametrlərə görə durum üzvlükdən öncə olduğundan da pisdir. Müstəqil medianın durumu kəskin pisləşib, bir müstəqil telekanal belə yoxdur. Ölkənin iki ən böyük müxalifət partiyalarının şəhərin mərkəzindəki ofisləri əllərindən alınıb, müstəqil QHT-lərin fəaliyyəti demək olar iflic olunub. Siyasi fəallar işləmək imkanlarından məhrumdur, nəinki özləri, ailələri də təqib edilir, iqtidara qarşı tənqidi fikir həyat üçün təhlükəyə dönüb. 

Ölkə demokratları və vətəndaş cəmiyyətinin geniş birliyi kimi AŞPA-dan ölkədə insan hüquq və azadlıqlarının pozulmasına münasibətdə daha prinsipial və qəti mövqe gözləyirik. -05D-