Müsavat Partiyası referendumun nəticələrinin ləğv edilməsini tələb edib

26 sentyabr referendumu konstitusiyaya təklif edilən düzəlişlər zərurəti xalqa izah edilmədən, Avropa Şurası Venesiya Komissiyasının ekspertizası olmadan və azad siyasi rəqabət və təşviqat üçün bərabər imkanların olmaması şəraitindən keçirilib. Səsvermə qeyri-azad və ədalətsiz olub və beynəlxalq standartlara əsaslanmayıb. Bu barədə Müsavat Partiyasının 26 sentyabr referendumu haqqında ilkin rəyində bildirilir.

Hesabatda qeyd edilir ki, referendum üzrə kampaniya müxalifət fəallarının təqibi, cinayət və inzibati xəta ittihamları ilə həbsləri ilə müşaiyət olunub.

ReAl hərəkatının icraçı katibi Natiq Cəfərli, NİDA hərəkatının fəalı Elgiz Qəhrəman, AXCP fəalları Faiq Əmirli və Fuad Əhmədli uydurma cinayət ittihamları ilə həbs olunub.

Ölkənin müxtəlif regionlarında Müsavat Partiyasının fəalları son nəticədə MSK tərəfindən qeydiyyata alınmayan “Respublika” təşviqat qrupuna dəstək üçün imza toplayarkən təzyiqlərə məruz qalıblar.

AŞ Venesiya Komissiyasının, ATƏT DTİHB-nin və digər təşkilatların əvvəlki tövsiyələrinə baxmayaraq, seçki qanunvericiliyi təkmilləşdirilməyib: seçki komissiyalarının tərkibi tarazlaşdırılmayıb və hakimiyyətin nəzarəti altında qalıb, şikayətlərə baxılması prosedurları dəyişdirilməyib.

Seçici siyahılarında da problemlər var. Dövlət Statistika Komitəsi 6,6 mln. seçici olduğunu bildirdiyi halda, MSK-nın məlumatına görə onların sayı 5,1 mln. nəfərdir.

Müsavat Partiyasının bütün ölkə üzrə 250-dən çox müşahidəçisinin monitorinq üçün qeydiyyatından imtina edilib. Bununla belə, seçicilərdən və bitərəf müşahidəçilərdən pozuntular haqqında məlumatlar daxil olurdu.

Müsavat hesab edir ki, referendumda real iştirak 10-12% təşkil edib və 25%-lik kvorum təmin olunmadığına görə səsvermə baş tutmuş hesab oluna bilməz.

Səsvermə günü inzibati resurslardan kütləvi istifadə faktları qeydə alınıb, dövlət idarələri öz əməkdaşlarını məntəqələrə daşımaqla məşğul olub.

Hakimiyyətin təzyiqi ilə biznes qurumları öz işçilərini məntəqələrə göndərmək məcburiyyətində qalıb.

Bütün seçki dairələrində “karusellərdən” istifadə olunub. Komissiya üzvlərinin və kənar şəxslərin bülletenləri qutulara atması halları qeydə alınıb.

Bülletenlər məntəqə ilə əlaqəsi olmayan şəxslərə verilib.

Səsvermənin yekunları üzrə protokollar seçki məntəqələrindən kənarda doldurulub, seçki məntəqələrində onların surətləri asılmayıb. Bir sıra hallarda ümumiyyətlə səslər sayılmayıb.

Referendumdan əvvəl ölkədə seçkiqabağı demokratik mühit olmayıb.

Yuxarıda deyilənləri nəzərə alaraq, Müsavat Partiyası hesab edir ki, referendum baş tutmayıb, səsvermə isə azad və ədalətli olmayıb. Referendumda elan olunan nəticələr xalqın iradəsini əks etdirmir.

Seçicilərin mütləq əksəriyyətinin referendumda iştirak etməməsi göstərib ki, xalq hakimiyyətin sülələnin əlində cəmləşməsinə qarşıdır və respublika dəyərlərinə sadiqdir.

Bu əsasla Müsavat Partiyası 26 sentyabr referendumunun nəticələrinin ləğvini tələb edib. -06D-