Müsavat Partiyası tərəfdarlarının Xocalı faciəsinin qurbanlarının abidəsinə gül qoymasına imkan verilməyib

Bakı/26.02.19/Turan: Bu gün Xocalı faciəsinin anım mərasimində müxalifətdə olan Müsavat Partiyasının tərəfdarlarının Xətai rayonundakı "Ana fəryadı" abidəsinin önünə gül dəstələri qoymasına imkan verilməyib. İnsident zamanı Müsavat Partiyasının Mətbuat Xidmətinin əməkdaşı Mehman Kamran xəsarət alıb, onu təcili tibbi yardım avtomobili hadisə yerindən xəstəxanaya aparıb. Bu barədə Müsavat Partiyasının başqanı Arif Hacılı bildirib.

Hacılı bildirib ki, faciə qurbanlarının abidəsini ziyarət edənlərə qarşı bu hərəkətlər hakimiyyət üçün utanc olmalıdır.

"Bizə sadəcə Xocalı abidəsinə gül qoymağa imkan vermədilər. Bu abidənin açılışında hakimiyyəti mən təmsil etmişəm. Həm 20 Yanvarda, həm Xocalı faciəsi günü bizə abidə önünə gül qoymağa imkan vermirlər. Biz burada başqa aksiya keçirmirik. Biz anım mərasimi keçiririk", deyə o qeyd edib.

O hesab edir ki, iqtidar bu hərkətlərlə faciəni unutdurmağa çalışır.

"Azərbaycan xalqı hakmiyitəin bu tipli davranışlarına baxmayaraq, Xocalı faciəsini unutmayacaq. Xalqımız Xocalıdakı faciəni heç zaman unutmayacaq. Hökumət xalqı bölməyə, ayırmağa çalışsa da, Azərbaycan xalqı birləşərərk demokratik dövlət yaradacaq və Xocalı faciəsini törədənləri cəzalandıracaq", deyə Müsavat başqanı qeyd edib.

Müsavat Partiyasının keçmiş başqanı İsa Qəmbər baş verənləri biabırçılıq adlandırıb.

"Xocalı faciəsi günü hakimiyyətin belə biabırçı işlər görməsi onların xalqla birgə olmadığını göstərir", deyə İsa Qəmbər qeyd edib. -03B-