Niyə Gürcüstan azərbaycanlıları hökumətə səs verdilər?

Gürcüstanda keçirilən parlament seçkilərində hakim Gürcü Arzusu Partiyası  erməni və azərbaycanlı əhalinin sıx olduğu rayonlarda çoxluq qazanıb: Axalkalaki – 88 faiz, Ninotsminda – 90 faiz, Marneuli – 80 faiz, Bolnisi – 81 faiz, Tetritskaro – 68,6 faiz, Dmanisi – 76,4 faiz, Tsalka – 69,3 faiz və Qardabani – 70,8 faiz. Marneulidə bülletenlərin atılmasına dair kadrlar Gürcüstanda və onun hüdudlarından kənrda sosial şəbəkələrdə geniş yayılıb. Gürcü Arzusu milli azlıqların az olduğu Tbilisidə uduzub.

Seçki komissiyasının üzvü, Marneuli rayonunun Qaçaqan kəndindən olan Nəsimi əliyev X platformasında (əvvəllər Twitter) bildirib ki, hakim partiya əyalətlərdəki azərbaycanlılara pul paylayıb, əslində onların səsini alıb. "Onlar adamları qorxudurdular və şantaj edirdilər, gecə pul ilə evlərinə gedirdilər. Rusiyada yaşayan Azərbaycan və Gürcüstan azərbaycanlılarının da təsiri rol oynadı, çünki yerli sakinlər Rusiyadan pul köçürmələrindən asılıdırlar".

REAL Partiyasının rəhbəri Natiq Cəfərli qeyd edib ki, Gürcüstandakı azərbaycanlılar hakimiyyətdə olanlara səs verməyə meyllidirlər. Saakaşvili dövründə onun partiyası azərbaycanlıların yaşadığı rayonlarda səslərin 80 faizini qazanmışdı. O bu tendensiyanın bir neçə səbəbini açıqlayıb:

• Sağ qalma strategiyası: Azərbaycan sakinləri hakim partiya ilə əlaqələri kəsmək istəmirlər, buna sağ qalma strategiyası kimi baxırlar.
• Dil və siyasi bölgü: çoxları gürcü dilini bilmir, siyasi mübahisələrdən uzaqdır və ideoloji cəhətdən heç bir partiyaya meylli deyil. Lakin mühafizəkarlığa meyllidirlər və beləliklə,  Gürcü Arzusunu dəstəkləyirlər.
• Saakaşvilinin irsinə hörmət: Saakaşvili polisdəki korrupsiya və rüşvətxorluğu azaltdığı üçün hələ də hörmət qazanır, lakin Gürcü Arzusu  12 ildir hakimiyyətdə olduğu üçün çoxları geri dönüşün olmadığını düşünür. Təbliğat da öz rolunu oynayır, düşüncə belədir ki, "əgər müxalifət hakimiyyətə gələrsə, müharibə olacaq" və indiki  hökumət ənənəvi dəyərləri Qərb tərəfindən azlıqların hüquqlarının təşviqindən qoruyur.

Politoloq Şahin Cəfərli bildirir ki, Gürcüstanda seçkilər hökumətlərin inzibati resurslardan istifadə etdiyi zəif demokratik təsisatları olan ölkələrdə, xüsusən də Rusiyanın güclü təsiri altında olan keçmiş sovet respublikalarında hakim iqtidarı  devirməyin çətinliyini önə çəkir.

"Geosiyasi aspektə gəlincə, postsovet bölgəsinin Rusiya üçün həyati əhəmiyyətli maraqlar zonası olduğunu yada salmaq vacibdir, Qərb isə ona müəyyən maraqları olan periferik region kimi baxır. Ancaq Rusiya üçün bu rəqabət ekzistensial olsa da, bu regiona daha çox Avropanın periferiyası kimi baxan Qərb üçün bu, belə deyil", - Cəfərli X-də yazıb.