N.Məmmədov Acwa Power-in nümayəndə heyətini qəbul edib

Bakı/31.08.19/Turan: Avqustun 30-da baş nazir Novruz Məmmədov Səudiyyə Ərəbistanının Acwa Power şirkətinin nümayəndə heyətini qəbul edib.

Nazirlər Kabinetinin mətbuat xidmətinin verdiyi məlumata görə, Acwa Power şirkətinin idarə heyətinin sədri Məhəmməd Əbunayan bərpa olunan enerji mənbələri və su layihələri sahəsində ixtisaslaşan şirkətin fəaliyyəti haqqında məlumat verib.

O, həmçinin bildirib ki, bu il martın 17-də Azərbaycan Energetika Nazirliyi və Acwa Power arasında qarşılıqlı anlaşma memorandumu imzalanıb.

Öz növbəsində, Novruz Məmmədov qeyd edib ki, alternativ enerjinin inkişafı ölkə üçün prioritet istiqamətlərdən biridir və Azərbaycan elektrik enerjisi istehsalı sahəsində beynəlxalq şirkətlərlə əməkdaşlıqda maraqlıdır.

http://www.ibcentre.tech -in məlumatına görə, bu ilin iyununda ACWA Power bərpa olunan enerji sahəsində törəmə şirkəti olan ACWA Power Renewable Energy Holding Ltd.-nin səhmlərinin 49%-ni Çinin "İpək Yolu" Dövlət Fonduna satıb.

Şirkət Yaxın Şərq və Afrikada ümumi gücü 1668 MVt təşkil edən müxtəlif layihələrin səhmdarıdır. Bu, həm fotoelektrik stansiyaları, həm günəş enerjisi hasil edən stansiyalar, həm külək aktivləridir.

"İpək Yolu" Fondu Çindən Asiya vasitəsilə Cənubi Avropa və Afrikaya gedən tarixi ipək yolu boyunca infrastrukturun yaxşılaşdırılmasına yönəlmiş investisiyalara görə məsul olan dövlət təşkilatıdır.-02D-