Ombudsman hüquq mühafizəçilərinin vətəndaşların hüquqlarını pozması haqqında

Bu gün ombudsman Elmira Süleymanova Milli Məclisin iclasında ötən ilin yekunları ilə bağlı hesabat verib. O, məhkəmə, Baş Prokurorluq, DİN və digər qurumların əməkdaşları tərəfindən vətəndaşların hüquq və azadlıqlarının pozulması statistikasını açıqlayıb.

Belə ki, ötən il müxtəlif instansiya məhkəmələrində insan hüquqlarının tapdanması ilə bağlı bir neçə hadisə qeydə alınıb. Yoxlamaların yekunlarına görə 5 hakim vaxtından əvvəl işdən çıxarılıb, 3 məhkəmə korpusu sədri aşağı vəzifələrə keçirilib.

Ötən il Baş Prokurorluq 49 əməkdaşını məsuliyyətə cəlb edib. 20 prokurorluq əməkdaşı ciddi töhmət, üç nəfər tənbeh alıb.

DİN əməkdaşları tərəfindən 252 pozuntu faktı qeydə alınıb: 8 vətəndaş əsassız olaraq cinayət məsuliyyətinə cəlb edilib, 118 vətəndaşa kobud davranılıb, 63 nəfər əsassız olaraq polisə gətirilib, 43 sürücünün və 5 əcnəbinin hüquqları pozulub.

Bu faktlarla bağlı 341 DİN əməkdaşı inzibati qaydada cəzalandırılıb: 33 nəfər daxili işlər orqanlarından xaric edilib, 21 nəfər tutduğu vəzifədən azad edilib, 287 nəfər barəsində inzibati tədbirlər görülüb.

İl ərzində ombudsmana polis orqanlarından ümumilikdə 1840 şikayət daxil olub.

Ötən il insan hüquqları müvəkkili institutuna vətəndaşlardan 13 670 müraciət daxil olub. Onlarn cəmi 47,6%-i baxılması üçün qəbul edilib, bunun 65,5%-nə isə mahiyyəti üzrə baxılıb, deyə Süleymanova bildirib.

Maraqlıdır ki, Elmira Süleymanova insan hüquqlarına deyil, ölkədə iqtisadiyyat sahəsində nailiyyətlərə daha çox əhəmiyyət verib.

Deputat İqbal Ağazadə müzakirələrdə iştirak edən 10 deputatdan sənəddə çatışmazlıqlar olduğunu, mənzil sahiblərinin hüquqlarının kütləvi şəkildə pozulduğunun əksini tapmadığını qeyd edən yeganə şəxs olub.

Ombudsman müxalifətin və vətəndaş cəmiyyətinin kütləvi aksiyalar keçirilməsi haqqında paytaxt meriyasına bütün müraciətlərinə imtina cavabı verilməsi faktı ilə bağlı heç nə deməyib. Bundan başqa, o, ötən il hüquqları pozulan jurnalistlərin - cəza çəkən Tofiq Yaqublu, Əvəz Zeynalov, Hilal Məmmədovun, istintaq altında olan Pərviz Həşimlinin adını çəkməyib. Bu müxalifətçilər uydurma ittihamlarla qarşılaşıblar və peşə fəaliyyətləri ilə əlaqəsi olmayan maddələrlə (iğtişaşlara təhrik etmə, pul tələb etmək məqsədilə şantaj, silah ticarəti və s.) həbsdədirlər.

İnsan hüquqları müvəkkilinin hesabatı səs çoxluğu ilə qəbul edilib. Bir il əvvəl sənəd ətrafında qızğın müzakirələr gedirdisə, bu gün yalnız bir deputat prinsipial narazılıq bildirib.

MM-in bugünki iclasının gündəliyinə həmçinin AR “Akkreditasiya haqqında” qanununun ikinci oxunuşda müzakirəsi, AR İnzibati Xətalar Məcəlləsinə əlavə və dəyişikliklərin müzakirəsi daxil idi. Bundan başqa, Azərbaycan və Polşa hökumətləri arasında beynəlxalq avtomobil daşımaları haqqında saziş ratifikasiya edilib. -17D-