Prezident İlham Əliyev erməni qüvvələrin işğal edilmiş ərazilərdən çıxarılmasına çağırıb

Bakı06.11.18/Turan: Bu ilin yazında Ermənistanda baş vermiş hakimiyyət dəyişikliyi 2016-cı ilin aprel döyüşlərinin məntiqi nəticəsidir, o zaman Azərbaycanın işğal edilmiş ərazilərinin bir hissəsi azad edildi. Bu barədə prezident İlham Əliyev ötən gün Ağdam Muğam Mərkəzinin açılışında çıxış edərkən bildirib.

"2016-cı ilin aprelində Ermənistanın işğalçı rejiminə çox böyük zərbə vuruldu və onlar öz işğalçılıq siyasətinin qurbanına çevrildilər. Mən dəfələrlə demişdim ki, Ermənistanı idarə edən kriminal xunta rejimi bütün dünya birliyi tərəfindən qınaq obyektinə çevrilməlidir. İndi bunu erməni xalqı deyir", - İ.Əliyev bildirib.

"Biz bundan sonra da Ermənistanı bütün regional layihələrdən təcrid edəcəyik, bütün vasitələrdən istifadə edib öz ərazi bütövlüyümüzü bərpa edəcəyik.

Ermənistanın yeni rəhbərliyi əvvəlki kriminal rejimin səhvlərini təkrarlamamalıdır, işğal edilmiş torpaqlardan öz işğalçı qüvvələrini tezliklə danışıqlar yolu ilə çıxarmalıdır və imkan verməlidir ki, Azərbaycan vətəndaşları öz doğma, tarixi, əzəli torpağına qayıtsınlar", - o vurğulayıb.-02D-