Prezident İlham Əliyevin rəsmi görüşləri

Cümə axşamı prezident İlham Əliyev Avropa Olimpiya Komitəsinin prezidenti Patrik Hikkini qəbul edib.

Patrik Hikki “Bakı 2015” Avropa Oyunlarının Əlaqələndirmə Komitəsinin 3-cü toplantısı zamanı Azərbaycanda Avropa Oyunlarına hazırlıq işləri ilə bağlı səmərəli müzakirələrin aparıldığını qeyd edib. Hazırlıq işlərinin qrafikə uyğun şəkildə görüldüyünü vurğulayan P. Hikki bu işlərin bütün sahələrdə yüksək səviyyədə həyata keçirilməsindən razılığını bildirib.

Görüşdə Azərbaycanın müvafiq qurumları ilə Avropa Olimpiya Komitəsi arasında əməkdaşlığın perspektivləri ilə bağlı məsələlər ətrafında fikir mübadiləsi aparılıb.

Sonra dövlət başçısı Dünya Turizm Təşkilatının baş katibi Taleb Rifaini qəbul edib.
  Görüşdə Azərbaycanda turizmin, o cümlədən dağ turizminin inkişafı və bu istiqamətdə müasir infrastrukturun yaradılması ilə bağlı görülən işlərdən danışılıb, Bakıda keçirilən 13-cü Azərbaycan Beynəlxalq turizm və səyahətlər sərgisinin və BMT-nin Dünya Turizm Təşkilatı Avropa Komissiyasının 57-ci konfransının önəmi qeyd olunub.

Söhbət zamanı Azərbaycan ilə Dünya Turizm Təşkilatı arasında əməkdaşlığın daha da genişləndirilməsi, ölkəmizin turizm imkanları və bu sahədə görüləcək işlərlə bağlı məsələlər ətrafında fikir mübadiləsi aparılıb.

Həmin gün İ.Əliyev Tacikistanın xarici işlər naziri Sirociddin Aslovu qəbul edib.

Qonaq prezident Emoməli Rəhmonun İ.Əliyevi Tacikistana rəsmi səfərə dəvət məktubunu dövlət başçısına təqdim edib.

Görüş zamanı tərəflər müxtəlif sahələrdə əməkdaşlıq perspektivlərini müzakirə ediblər. -02D-