Prezident İlham Əliyevin son çıxışındakı mesajlar barədə

Bakı/21.09.20/Turan: Sentyabrın 19-da dövlət başçısı İlham əliyev yerli telekanallara müsahibəsində müharibə təhlükəsinin artmasını və Ermənistanla danışıqların faydasız olmasından xəbər verən  Ermənistan-Azərbaycan münaqişəsi ilə bağlı bir sıra mühüm bəyanatlar verib.

İ.Əliyevin çıxışının əsas tezisləri aşağıdakılardır:

1) Azərbaycana qarşı ciddi təxribat törədilərsə, Azərbaycan hərbi əməliyyatları Ermənistan ərazisinə keçirə bilər.

“İyul təxribatının Ermənistan tərəfindən başladığı heç kimə sirr deyil və bunu Minsk Qrupunun həmsədr ölkələrindən birinin yüksək rütbəli nümayəndəsi (RF XİN rəhbəri Sergey Lavrov nəzərdə tutulur-red.) etiraf edib.

Bizim Ermənistan ərazisində heç bir hərbi məqsədimiz yoxdur, əgər istəsəydik, Ermənistan ərazisinə keçə bilərdik, bunun üçün bütün hərbi imkanlarımız vardı. Ancaq biz bunu etmədik, çünki bizim hərbi-siyasi konsepsiyamızda bu, yoxdur, əgər bizə qarşı ciddi təxribat törədilməsə. Əgər törədilərsə, bizim üçün heç bir məhdudiyyət olmayacaq, bunu hər kəs bilsin. Heç bir məhdudiyyət yoxdur. Əgər onlar beynəlxalq hüquqa məhəl qoymurlarsa, nəyə görə biz ona əməl etməliyik, biz də məhəl qoymayacağıq, amma bütün bunlar onlar üçün pis nəticə verəcək”, - İ.Əliyev deyib.

2) Azərbaycan Dağlıq Qarabağ üzərində nəzarəti geri qaytaracaq.

“Biz mütləq öz  torpaqlarımıza qayıdacağıq. Dağlıq Qarabağ bizim qədim tarixi torpağımızdır və biz mütləq o torpaqlara qayıdacağıq. Biz dağılmış bütün tarixi abidələri, evləri bərpa edəcəyik. Küçələrə Azərbaycan adlarını verək, adını dəyişdirilmiş kəndlərə onların gerçək adlarını qaytaracağıq. Biz bunu mütləq edəcəyik, çünki həqiqət bizim tərəfimizdədir.

Biz ikinci erməni dövlətinin yaradılmasına heç vaxt imkan verməyəcəyik. Qarabağ bizimdir, Qarabağ Azərbaycandır!”, - İ.Əliyev bildirib.

3)Ermənistan hakimiyyəti reallıq hissini itirib və artıq  Türkiyəyə qarşı ərazi iddiaları irəli sürməyə çalışır.

“Ermənistan Türkiyəyə qarşı ərazi iddiaları irəli sürüb. Bu, onların Konstitusiyasında öz əksini tapıb. Bu gün Ermənistan Sevr müqaviləsini “canlandırmağa” çalışır.

Səfalət içində yaşayan, dövləti öz torpaqlarında qurmayan kiçik ölkə Türkiyə kimi bir ölkəyə qarşı iddialar irəli sürə bilərmi? Heç olmasa, öz potensialına bax, sonra da Türkiyənin potensialına”.

4)Ermənistanı öz siyasətini dəyişməsə, onu çətin günlər gözləyir.

“Ermənistan təcavüzkar dövlətdir. Onlara bir daha xəbərdarlıq etmək istəyirəm ki, əgər öz çirkin planlarından əl çəkməsələr, nəticələr onlar üçün çox ağır olacaq.

Onlar yeni müharibəyə hazırlaşırlar. Onların qüvvələrinin təmas xətti yaxınlığında konsentrasiyası gedir. Biz hər şeyi görürük, hər şeyi izləyirik. Əlbəttə, biz müdafiə olunacağıq. Əgər onlar yeni dərs almaq istəyirlərsə, biz buna hazırıq”, - o deyib.

5) Nizamlanmaya dair danışıqlar mənasını itirib.

“Ermənistan baş nazirinin absurd fikirləri danışıqlar prosesinə ciddi zərbə vurub. O, “Qarabağ Ermənistandır!” deməklə danışıqlar prosesini mənasız edib.

Biz danışıqlar formatının dəyişməsinə və onların Qarabağda marionet rejimi ilə aparılmasına heç vaxt razı olmayacağıq. Ermənistan faktiki olaraq danışıqlardan çıxıb.

Ermənistan Dağlıq Qarabağda qanunsuz məskunlaşma aparır və bunu nümayişkaranə şəkildə edir. Bu, Cenevrə Konvensiyasının pozulmasıdır.

Şuşa şəhərində bədnam rejimin “rəhbəri”nin andiçmə mərasimi keçirilir. Bu, növbəti təxribatdır. Bu, bizim üçün açıq təhqirdir. Onlar hesab edirlər ki, biz buna dözəcəyik?”,- İ.Əliyev deyib.

“Təəssüf ki, Ermənistanın indiki rəhbərliyi bu məsuliyyəti dərk etmir. Onlar bu addımların nəyə aparıb çıxara biləcəyini düzgün təhlil edə bilmirlər.

İki il öncə, Ermənistanda dövlət çevrilişi baş verdiyi zaman Azərbaycan buna bitərəf qaldı. Yəni, biz vəziyyətdən istifadə etmək fikrində olmadıq.

Xüsusən də nəzərə alsaq ki, yeni hakimiyyət iqtidara gələndə çox ümidverici bəyanatlarla çıxış etməyə başlamışdı ki, onlar bu məsələni həll etmək istəyirlər, əvvəlki hakimiyyəti tənqid edirdilər, bizə qeyri-rəsmi kanallarla müsbət siqnallar göndərirdilər, vaxt istəyirdilər.

Düşənbədə Ermənistanın baş naziri ilə görüşümdən sonra məsələnin  sülh yolu ilə həllinə ümidlər möhkəmləndi. O vaxt məndən xahiş edirdilər ki, onlara vaxt verim, Ermənistanda daxili vəziyyət ağırdır, xahiş edirdilər ki, atəşkəs möhkəmlənsin.

Minsk Qrupunun həmsədrləri də müəyyən müddət ümidlərlə yaşadılar. Lakin Ermənistanın baş nazirinin “Qarabağ Ermənistandır!” kimi absurd fikirləri danışıqlar prosesini mənasız etdi, İ.Əliyev qeyd edib.-02D-