Qarabağ Azərbaycandır! Və ya Çemberlenə cavabımız

Bakı/03.10.19/Turan: Prezident İlham Əliyevin oktyabrın 3-də Soçidə Valday forumunda çıxışını, təkcə mahiyyətinə görə deyil, həm də tədbirin statusuna görə misilsiz hesab etmək olar.

Bu forumda Əliyevə söz verilməsi və onun Ermənistanın ünvanına kəskin, ultimatum xarakterli bəyanatları istər-istəməz Rusiyanın səssiz razılığı kimi qiymətləndirilir.

Əliyevin çıxış kadrlarında Vladimir Putinin onu necə gərgin şəkildə dinlədiyi yaxşı görünür. "25 ildir Dağlıq Qarabağ və Azərbaycanın digər 7 rayonunun ərazisi erməni işğalı altındadır. Dağlıq Qarabağ tarixən Azərbaycan torpağıdır. Sovet dövründə Dağlıq Qarabağ muxtar vilayəti yaradılıb. Deməliyəm ki, münaqişə ilə əlaqədar çox vaxt reallığı əks etdirməyən kifayət qədər geniş fikir diapazonu mövcuddur. Beləliklə, aydınlıq gətirmək üçün deməliyəm ki, 1921-ci ildə Kavbüronun qərarı sözbəsöz belə idi "Dağlıq Qarabağ Azərbaycanın tərkibində saxlanılsın", erməni tərəfin çox vaxt təfsir etdiyi kimi "verilsin" deyil", deyə Əliyev bildirib.

"Münaqişə başlamazdan əvvəl AzSSR-in Dağlıq Qarabağ muxtar vilayətində 25%-75% nisbətində azərbaycanlı və erməni əhali yaşayırdı. Münaqişə nəticəsində Dağlıq Qarabağdan, habelə Azərbaycanın digər 7 rayonundan bütün azərbaycanlı əhali sürgün edildi. Başqa sözlə, etnik təmizləmə aparıldı. Azərbaycan humanitar qəza ilə üzləşdi: Dağlıq Qarabağ və digər işğal edilmiş ərazilərdən 700 min məcburi köçkün, üstəgəl Ermənistanda tarixi torpaqlarından qovulmuş 250 min azərbaycanlı".

"BMT TŞ 4 qətnamə, o cümlədən erməni qüvvələrinin işğal edilmiş ərazilərdən dərhal və qeyd-şərtsiz çıxarılması haqqında qətnamələr qəbul edib, amma 25 ildən çoxdur onlar yerinə yetirilmir. Qətnamələrin həyata keçirilməsinin seçkili xarakteri bizi narahat edir. Bəzən onlar günlər ərzində yerinə yetirilir, bəzən ümumiyyətlə müəyyən hərbi əməliyyatların aparılması üçün onlara ehtiyac olmur, bizim halda isə qətnamələr kağız üzərində qalır.

Dağlıq Qarabağ Ermənistan-Azərbaycan münaqişəsinin həlli Azərbaycanın bütün dünya tərəfindən qəbul edilmiş ərazi bütövlüyü, BMT Nizamnaməsi, BMT TŞ qətnamələri və Helsinki Yekun Aktı çərçivəsində olmalıdır", deyə o qeyd edib.

"Deməliyəm ki, son vaxtlar Ermənistanın baş naziri tez-tez deyir ki, münaqişənin həlli Azərbaycan xalqı, Ermənistan xalqı və Dağlıq Qarabağ xalqı üçün məqbul olmalıdır. "Dağlıq Qarabağ xalqı" anlayışı yoxdur. Dağlıq Qarabağ əhalisi var, münaqişəyə qədər bu, bərabər hüquqlara malik azərbaycanlı və erməni əhalidən ibarət idi", deyə o bildirib.

"Azərbaycan üçün hansı qərarın məqbul olduğuna gəlincə, bu, Azərbaycanın bütün dünya tərəfindən tanınmış ərazi bütövlüyünün bərpasından və qaçqınların və məcburi köçkünlərin tarixi torpaqlarına, o cümlədən Dağlıq Qarabağa qaytarılmasından ibarətdir. Bu, BMT TŞ-nin qətnamələrinə və Helsinki Yekun Aktına uyğundur", deyə İlham Əliyev qeyd edib.

"Həmçinin, Ermənistan baş nazirinin təəccüb doğuran bəyanatına toxunmaq istərdim, həm də bu bəyanat təkcə Azərbaycanda təəccüb doğurmayıb, Valday forumu çərçivəsində RF tərəfindən də müvafiq reaksiya verilib. Bəyanat, demək olar ki, sözbəsöz belədir: "Qarabağ Ermənistanın bir hissəsidir, nöqtə". Birincisi, bu, yumşaq desək, yalandır. Qarabağ bütün dünyada, həm düzlük, həm dağlıq olaraq Azərbaycanın ayrılmaz hissəsi kimi tanınıb. Ermənistan özü bu qanunsuz təşəkkülü tanımır. Odur ki, Qarabağ Azərbaycandır və nida!", deyə İlham Əliyev vurğulayıb. -02D-

Rəy yaz

Siyasət

Zorakılıq cəmiyyətdə nəyin göstəricisidir? – Mehriban Vəzir Çətin sualda



Əziz Bakı şəhəri sakini!

Siz də Qlobal İqlim Dəyişmələri ilə mübarizəyə öz töhfənizi verə bilərsiniz

Dear resident of Baku city!

You too can contribute to the fight against Global Climate Change

Дорогой житель города Баку!

Вы тоже можете внести свой вклад в борьбу с глобальным изменением климата

Bizi sosial şəbəkələrdə izləyin

Xəbər lenti