Qarabağdaki sülhməramlıların gələcəyi hələ müəyyən edilməyib, lakin sülh sazişi realdır - Putin

Bakı/13.10.23/Turan: Bölgənin Azərbaycanın tam nəzarətinə keçdikdən sonra Rusiya sülhməramlılarının Qarabağda olması üçün hansı hüquqi əsaslar var? Bişkekdə jurnalistlərin Rusiya prezidenti Vladimir Putinə verdiyi bu suala o, belə cavab verib: “Ermənistan Qarabağın Azərbaycanın bir hissəsi olduğunu tanıyanda məlum oldu ki, bizim sülhməramlılarımız, şübhəsiz, Azərbaycan Respublikasının ərazisindədirlər.  Və təbii ki, indi - xüsusən də, erməni əhalisinin köçü ilə bağlı ağır hadisələrdən sonra - vəziyyət artıq tamamilə, kökündən dəyişib.

Amma formal olaraq sülhməramlılarımız 2025-ci ilin noyabrına qədər orada olacaqlar və biz, əlbəttə ki, tərəfdaşlarımızla dialoqda yaxın gələcəkdə nəyi və necə edəcəyimizi müəyyənləşdirib həll etməli olacağıq. Danışıqlar zamanı buna qərar verəcəyik”.

Rusiya prezidenti Bakı ilə İrəvan arasında sülh sazişinin perspektivlərinin nədən ibarət olduğunu soruşduqda, İrəvanın Qarabağı Azərbaycanın ərazisi kimi tanımaq qərarını bir daha xatırladıb.

Paşinyanın Praqada verdiyi bu bəyanat “Qarabağın statusunu müəyyənləşdirdi: Ermənistan Qarabağın Azərbaycan Respublikasının bir hissəsi olduğunu tanıdı”.

Əvvəlki illərdə tərəflər Qarabağla bağlı razılaşmaya yaxın idilər. Problem referendumla bağlı idi. Azərbaycan referendumun vaxtının müəyyən edilməsinin əleyhinə idi.

“Çünki indiki şəraitdə referendum keçirilsə - sabah və ya hətta 20 ildən sonra olmasından asılı olmayaraq - referendumun nəticəsi bəlli olacaq. Ona görə də bunu sadəcə olaraq gələcək nəsillərin qərarı ilə əlaqələndirmək təklif olundu”.

Erməni tərəfi isə əksinə, referendumun vaxtının təyin olunmasında, bu referendumda isə Qarabağın statusunun müəyyən edilməsində təkid edirdi. Çünki onlar həm də ondan çıxış ediblər ki, 20 ildən sonra referendum keçirilsə belə, əhalinin indiki tərkibi ilə nəticə göz qabağında olacaq”.

Lakin Paşinyanın Praqa bəyanatından sonra referendumun mövzusu bağlandı və “son çətin hadisələrdən və erməni əhalisinin köçündən sonra vəziyyət kəskin şəkildə dəyişdi”, Putin qeyd edib.

“Biz sülh sazişinin bağlanması ümidi ilə sülh danışıqlarının bərpasına kömək etməyə hazır olacağıq və bütün həmkarlarımızı Moskvaya toplaşmağa dəvət etmişik. Baş nazir Paşinyanın bundan xəbəri var, mən ona dedim, Azərbaycan prezidentinin də bundan xəbəri var. Mənə elə gəlir ki, bu, tamamilə mümkündür”.

Putinin sözlərinə görə, sərhədin demarkasiyası və delimitasiyası ilə bağlı texniki məsələlər var.

“Bir istiqamətdə 100 metr, digər tərəfdə bir kilometr, artıq fərqi yoxdur. Hər iki tərəfin xoş niyyəti ilə bütün bunları həll etmək olar”, - Putin hesab edir. -0-