Qaribaşvili Gürcüstan və Azərbaycanın əməkdaşlığını nümunəvi adlandırıb

Tbilisi/06.11.15/Turan-BS PRESS: Gürcüstanın baş naziri İrakli Qaribaşvili Gürcüstan-Azərbaycan münasibətlərini “çoxillik əməkdaşlığın ən yaxşı nümunəsi” adlandırıb, bu barədə hökumətin mətbuat xidmətinin məlumatında deyilir.

Qaribaşvili bu bəyanatı noyabrın 6-da Tbilisidə Azərbaycan prezidenti İlham Əliyevlə görüşdə səsləndirib. Tərəflər birgə enerji layihələrini və iqtisadi layihələri müzakirə ediblər.

“Biz bu yaxınlarda Bakıda görüşmüşdük, indi isə Gürcüstanda və mən buna şadam. Bu, iki ölkə arasında münasibətlərin getdikcə dərinləşməsinin yaxşı göstəricisidir və biz birlikdə başladığımız layihələri həyata keçirəcəyik”, deyə Əliyev cavab nitqində bildirib.

Azərbaycanın Gürcüstana birbaşa xarici investisiyaları son üç ildə 3,7 dəfə artıb.

Səfərin birinci günü, noyabrın 5-də Əliyev Gürcüstan prezidenti Georgi Margvelaşvili ilə görüşüb. Cümə günü Gürcüstan parlamentinin sədri David Usupaşvili ilə, habelə Marneuli rayonunda (Kvemo Kartli bölgəsi) yaşayan etnik azərbaycanlılarla görüş keçirilib.

Qeyd edək ki, Azərbaycan nümayəndə heyətinin tərkibinə ölkənin bütün enerji idarələrinin rəhbərləri daxildir ki, bu da danışıqların mövzusuna dəlalət edir. Müşahidəçilərin fikrincə, Gürcüstana qaz ixracının həcmi məsələləri diqqət mərkəzindədir. Göründüyü kimi, Tbilisi bu həcmi artırmaq istəyir, amma imtiyazlı qiymətlərlə, Bakı imtina edəcəyi təqdirdə Gürcüstan əlavə həcmi Avropada və bütünlükdə dünyada olan amansız rəqabətlə əlaqədar qaz qiymətlərini xeyli azaltmaq məcburiyyətində qalan Rusiyadan almaq niyyətindədir. -02D-