QHT-nin qeydiyyatından imtina hüquqi yox, siyasi problemdir

Qeyri-hökumət təşkilatlarının dövlət qeydiyyatından imtina olunması ölkənin vətəndaş cəmiyyətinin ən ciddi problemlərindən biridir. Tez-tez  Ədliyyə Nazirliyi əsassız və subyektiv səbəblərdən QHT-nin qeydiyyatından imtina edir, bununla bağlı ağlabatan açıqlamalar vermir. “Demokratiyanın öyrənilməsi” İctimai Birliyinin apardığı ekspert rəyinin nəticələri belədir.

    Aİ-nin dəstəyilə ilə həyata keçirilən layihə çərçivəsində 200 QHT öyrənilib ki, bunların da qeydiyyatından Ədliyyə Nazirliyi imtina edib.

    “Demokratiyanın öyrənilməsi” QHT-nin rəhbəri Mirəli Hüseynov qeyd edib ki, bir çox QHT-nin qeydiyyatından 3-dən 8 dəfəyədək, hətta bundan çox imtina edilib. Baxmayaraq ki, onlar əvvəl göstərilən “nöqsanları” aradan qaldırıblar. 

    Qeydiyyata alınmış QHT-lərin statistikasına nəzər salsaq, 2006-cı ildən 2010-cu ilədək azaldığını görərik. Əgər 2006-cı ildə 548 QHT qeydiyyata alınmışdısa, 2010-cu ildə bu rəqəm 124, 2011-ci ildə 144 olub. 

    “Şəffaflıq olmadığından qeydiyyatından imtina edilən QHT-lərin  sayı barədə məlumat yoxdur”, - M.Hüseynov bildirib.

    Qarabağ müharibəsi veteranlarının problemləri ilə məşğul olan “Məşəl” QHT-nin rəhbəri Alman Abbasov bildirib ki, onun təşkilatının təkrar qeydiyyatından bir neçə dəfə imtina olunub. 

    “İki dəfə bizə təklif etdilər ki, nizamnaməyə dəyişiklik edək. Sonra qeydiyyat haqqında əvvəlki şəhadətnaməni tələb etdilər. Bundan sonra möhürü istədilər. Axı, bütün bunların hamısını birinci dəfədə etmək olardı”, - A.Abbasov vurğulayıb.

    Hüquqi Təşəbbüslər Mərkəzinin rəhbəri Ziya Quliyev hesab edir ki, qeydiyyat məsələsi hüquqi yox, siyasi problemdir. Qeydiyyat məsələsi Ədliyyə Nazirliyi yox, ölkə hakimiyyəti tərəfindən həll olunur. Odur ki, məsələnin həlli yalnız hakimiyyətin siyasi iradəsi olduqda mümkündür və hüquqların məhkəmələr vasitəsilə bərpası cəhdlərinin də mənası yoxdur. 

    QHT rəhbəri Əhməd Abbasbəyli hesab edir ki, hakimiyyət qeydiyyat məsələsini qəsdən fikirləşib ki, vətəndaş cəmiyyətinin diqqətini digər mühüm məsələlərdən yayındırsın. QHT-lərin maliyyə resurslarının çatışmaması, donorlar və QHT-lər arasında qarşılıqlı münasibətlərin şəffaf olmaması, praktiki olaraq QHT və dövlət arasında əməkdaşlığın olmaması da ciddi problemlərdir.  Regionlarda QHT-lərin fəaliyyət göstərmək üçün şəraiti yoxdur və hər dəfə tədbir keçirəndə hakimiyyətin icazəsi alınmalıdır.

    “Ehtiyatda və İstefada olan Zabitlər” QHT-nin rəhbəri Yaşar Cəfərli bildirib ki, QHT-lər özləri öz hüquqları uğrunda mübarizədə zmkar deyil. O, QHT-ləri konsolidasiyaya və birgə fəaliyyət göstərməyə çağırıb. 

    Prezident yanında QHT-lərə Dəstək Şurasının üzvü Əliməmməd Nuriyev qaldırılan  problemlərlə razılaşaraq bildirib ki, iyulun 2-də QHT və Prezident Administrasiyasının nümayəndələri arasında keçirilmiş görüşdən sonra bu məsələlərin həlli üzrə iş başlayıb. Onun sözlərinə görə, qeydiyyat problemi üzrə tədbirlər görüləcək, QHT-lərin maliyyə hesabatlılığının sadələşdirilməsi ilə bağlı düzəlişlər ediləcək, beynəlxalq QHT-lərin qeydiyyatı şərtləri sadələşdiriləcək.

    Görüşün sonunda QHT problemlərinin araşdırılması üzrə jurnalist müsabiqəsinin qaliblərinə mükafatlar verilib.—06C-