Robert Köçəryan: «Ki-Uestdə Azərbaycan Qarabağın Ermənistana birləşdirilməsinə razılıq vermişdi»

Ermənistanın ikinci prezidenti Robert Köçəryan “Azadlıq” radiosunun erməni xidmətinə müsahibəsində bildirib ki, 2001-ci ildə Ki-Uestdə Dağlıq Qarabağ münaqişəsinin nizamlanması məsələsi həllə yaxın idi.

“Mənim 10 illik prezidentlik dövründə yalnız bir dəfə Ki-Uestdə biz sənəd imzalanmasına  yaxın olmuşuq. Ancaq faktiki olaraq imzalanma mərasimində Azərbaycanın imtina etməsi səbəbindən bu, baş tutmadı.

Bu, paket və hərtərəfli həll idi. Bunun əsasında DQR Ermənistana birləşdirilirdi  və bu da ərazilərin qaytarılmasını, eləcə də təhlükəsizliyin təminatı üzrə kompleks tədbirlərin tətbiqini nəzərdə tuturdu”, - Köçəryan bildirib.

Onun fikrincə, hazırda danışıqlar prosesində vəziyyət Ermənistan üçün əlverişli deyil.

“Bu gün biz bir sıra mənfi amillərin şahidi oluruq ki, bu da ciddi narahatlıq doğurur: Rusiya silahlarının tədarükü ilə hərbi balansın pozulması, Dağlıq Qarabağa dair bir neçə xoşagəlməz qətnamə, beynəlxalq təşkilatların hesabatları,  Azərbaycanın təşəbbüsü ilə regional əməkdaşlığın yeni formatının formalaşması (təbii ki, Ermənistan olmadan), bizim ölkədən yan keçməklə  “Şimal-Cənub” nəqliyyat dəhlizinin yaradılması.

Baş verənlərin geosiyasi nəticələri iqtisadi, beynəlxalq və regional məsələlərdə bizim nüfuzumuza, əlbəttə ki, Dağlıq Qarabağ danışıqlarının gedişində bizim resurslarımıza uzunmüddətli mənfi təsir göstərəcək”, - Köçəryan vurğulayıb.

Onun sözlərinə görə, yalnız “Madrid prinsipləri” ermənilər üçün qismən məqbuldur. Çünki bunda Qarabağın öz müqəddəratını təyin etmək hüququ tanınıb. “Ancaq bu sənəd imzalanmaq üçün nəzərdə tutulmamışdı. Vasitəçilərin fikrincə, bu prinsiplər gələcək saziş üçün əsas olmalıydı. Vasitəçilər həmin prinsiplərin əsasında nizamlanmaya dair saziş yaratmağa çalışırdılar, lakin bu saziş heç zaman imzalanmağa yaxın olmamışdı”, - o qeyd edib.

“Artıq “Madrid prinsipləri” əvvəlki formasında yeni reallıqlara cavab vermir və yenidən baxılması tələb olunur. İlk növbədə, təhlükəsizlik zəmanətinin gücləndirilməsi, referendumun keçirilməsi müddətinin dəqiqləşdirilməsi və bununla əlaqədar ərazilərin qaytarılması kontekstində.

Məsələn, sazişin ayrılmaz hissəsi aşağıdakılar ola bilər: hərbi balansın bərpası, bu balansın ən azı 25 il müddətinə saxlanması barədə tərəflər və beynəlxalq birlik arasında ciddi və nəzarət olunan razılaşmanın olması.

DQR-in müstəqilliyi və Ermənistanla ümumi sərhəddin olması alver mövzusu ola bilməz. Aprel müharibəsi bizim nizamlanmaya yanaşmamızı sərtləşdirməlidir, zəiflətməli deyil, cünki hər hansı güzəştlə bağlı gələcək risklər artır”, - o bildirib.

Eyni zamanda Köçəryan Ermənistanda ictimai-siyasi və iqtisai durumu mənfi qiymətləndirib. Bir neçə ildir ki, cəmiyyətdə mənfi əhval-ruhiyyə yaranıb və getdikcə radikallaşır. “Ermənistan barıt çəlləyinin üzərində yaşayır”, - Köçəryan etiraf edib.-02D-