Rusiya hərbçiləri və rəsmiləri Ukraynada insanlığa qarşı cinayətlərə görə cavab verəcəklər - ABŞ dövlət katibi

Vaşinqton/19.02.23/Turan: ABŞ hökuməti Rusiyanı Ukraynadakı müharibə zamanı insanlığa qarşı cinayətlər törətməkdə rəsmən ittiham edib, TURANın Vaşinqton müxbiri xəbər verir.

Dövlət katibi Entoni Blinken şənbə günü deyib: “Diqqətli təhlillər və mövcud faktlar əsasında müəyyən edilib ki, Rusiya hərbçiləri və digər Rusiya rəsmiləri Ukraynada insanlığa qarşı cinayət törədiblər”.

Rusiya qüvvələrinin əsgərləri “ukraynalı kişi, qadın və uşaqları qətlə yetirib, saxlanılan mülki şəxslərə işgəncələr verib, elektrik kürsüsündə edamlar və saxta edamlar, zorlamalar törədiblər və yüz minlərlə ukraynalı mülki vətəndaşı, o cümlədən ailələrindən zorla ayrılmış uşaqları Rusiyaya deportasiya ediblər. "- Blinken qeyd etdi.

"Bu hərəkətlər təsadüfi və ya kortəbii deyil, onlar Kremlin Ukraynanın mülki əhalisinə genişmiqyaslı və sistematik hücumunun bir hissəsidir" o qeyd edib.

“Moskvanın Ukraynanın dinc əhalisinə vurduğu insan əzabının heyrətamiz miqyası Birləşmiş Ştatları Rusiya hərbçilərini və Rusiya rəsmilərini məsuliyyətə cəlb etməyə vadar edir”, - Blinken bildirib.

“Bu cinayətlərə görə cəzasızlıq ola bilməz. Bütün məsul şəxslər məsuliyyətə cəlb edilməlidir. Birləşmiş Ştatlar nə qədər vaxt lazımdırsa, Ukrayna xalqı üçün ədalət axtaracaq”.

“Prezident Putinin Ukraynaya qarşı apardığı amansız müharibə böyük iztirablara səbəb olsa da, bu daxili məhkəmələr, həm də beynəlxalq mexanizmlər vasitəsilə Ukraynadakı vəhşiliklərə görə məsuliyyət daşıyanların məsuliyyətə cəlb edilməsini təmin etmək üçün misli görünməmiş beynəlxalq tədbirlərlə nəticələndi”, - deyə açıqlamada bildirilir.

Şənbə günü Blinken Münhendə Ukraynanın xarici işlər naziri Dmitri Kuleba ilə görüşüb və onlar fevralın 24-nə davam edən hazırlıqları, o cümlədən BMT, ATƏT və digər çoxtərəfli forumlarda planlaşdırılan görüşləri müzakirə ediblər.

Dövlət Departamentinin sözçüsü Ned Prays deyib: “Dövlət katibi Ukraynaya qarşıdan gələn iqtisadi yardım paketlərini açıqlayıb və prezident Baydenin ABŞ-ın Ukrayna ilə bir olması barədə bəyanatını təsdiqləyib”.-0-