Rusiya müttəfiqlərini itirməkdə davam edir, sırada İsraildir

Bakı/25.07.22/Turan: İyulun 21-də Rusiya Ədliyyə Nazirliyi ölkə hakimiyyətini "Soxnut" yəhudi agentliyinin Rusiyadakı nümayəndəliyini ləğv etməyə çağırıb. Bundan sonra İsrailin baş naziri məsələnin diplomatik yolla həlli üçün Moskvaya nümayəndə heyətinin hazırlandığını bildirib. Lakin nümayəndə heyəti Moskvaya gedə bilməyib, çünki Rusiya tərəfi  viza verməyib.

Moskvanın hərəkəti İsrailin qəzəbinə səbəb olub,  o, Ukraynada müharibə ilə bağlı "neytral" mövqeyini dəyişəcəyilə hədələyib. İsrail Xarici İşlər Nazirliyi "Soxnut"un ləğv edilməsi halında "siyasi tədbirlər" hazırlayacaq. Təl-Əviv Rusiyada repatriasiya ilə məşğul olan "Soxnut" agentliyinin bağlanacağı təqdirdə siyasi tədbirlər görməyə hazır olacaq. İsrailin baş naziri Yair Lapid xəbərdarlıq edib ki, agentliyin ləğvi Rusiya ilə münasibətlərə xələl gətirəcək.

İsrail hökuməti beynəlxalq sanksiyalara qoşula bilər, Rusiyadakı keçmiş səfir Svi Maqen belə hesab edir.

İsrail KİV-in məlumatına görə, Rusiya tərəfi "Soxnut"un ləğvini onunla izah edib ki, bu təşkilat Rusiya vətəndaşları, elm və sahibkarlıqla məşğul olan yəhudilərin repatriasiyası ilə məşğuldur, onların gedişi isə “Rusiyanın elmi və işgüzar potensialını xeyli aşağı salır”.

Qeyd edək ki, Rusiyadan dünyanın bir çox ölkələrinə kütləvi gediş Ukraynaya qarşı təcavüzdən sonra başlayıb. Qeyri-rəsmi məlumatlara görə, müharibə başlayandan beş ay ərzində İsrailə 100 minə yaxın adam gedib. Bunlar əsasən ixtisaslı gənclərdir.

"Soxnut" təşkilatının Moskva, Sankt-Peterburq, Rostov-na-Donu, Yekaterinburq, İrkutsk, Pyatiqorsk, Samara, Xabarovsk və Novosibirskdə ofis və tərəfdaşları var. 1929-cu ildə yəhudilərin İsrailə repatriasiyası üçün yaradılıb. 02D