Slovakiya baş naziri ilə görüşdə Əliyev Avropa İttifaqı ilə münasibətlərin prioritetini qeyd edib

Bakı/14.11.18/Turan: Noyabrın 13-də axşam dövlət başçısı İlham Əliyev Slovakiyanın baş naziri Peter Pellegrinini qəbul edib. Rəsmi məlumata görə, görüş təkbətək keçirilib və Azərbaycanın Avropa İttifaqı ilə əməkdaşlığı çərçivəsində ikitərəfli münasibətlər müzakirə edilib.

Daha sonra danışıqlar nümayəndə heyətlərinin iştirakı ilə davam etdirilib.

"Biz tərəfdaşlığın genişləndirilməsində böyük potensial görürük və əminəm ki, səfərdə müzakirə edilmiş məsələlər gələcək tərəfdaşlığın möhkəm əsasını qoyacaq", deyən Əliyev Azərbaycanın Avropa İttifaqı ilə siyasi, iqtisadi, sosial, nəqliyyat və energetika sahələrində münasibətlərinin prioritet olduğunu bir daha vurğulayıb.

Öz növbəsində, Peter Pellegrini bildirib ki, nümayəndə heyətinin üzvləri Bakıda hökumətlərarası komissiyanın yaradılması, iqtisadi sahədə müqavilə-hüquq bazasının genişləndirilməsi üzrə səmərəli danışıqlar aparıblar.

Həmçinin investisiyalar, təhsil, turizm sahəsində əməkdaşlığın perspektivləri müzakirə olunub. -02D-