Tacikistan prezidentinin Bakıya səfəri gözlənilir

Bakı/08.08.18/Turan: Avqustun 10-11-də Tacikistan prezidenti Emoməli Rəhmon Bakıya rəsmi səfər edəcək, bu barədə Tacikistanın hökumət KİV-ləri məlumat yayıb.

"Aziya Plyus"un məlumatına görə, Rəhmonu İlham Əliyev qəbul edəcək, daha sonra nümayəndələrin iştirakı ilə danışıqlar keçiriləcək.

Rəhmonu həmçinin Azərbaycanın baş naziri və parlamentin spikeri qəbul edəcək.

Tacikistan və Azərbaycan arasında iqtisadi əməkdaşlığın prioritet istiqamətləri əlvan metallurgiya, aqrar-sənaye kompleksi, energetika, yüngül sənaye, nəqliyyat və kommunikasiyalardır.

"Gələn il dünya bazarlarında alüminin qiyməti xeyli artacaq və bununla əlaqədar Tacikistan 2019-cu ildə bu metalın istehsalını 245,5 min tona çatdırmağı planlaşdırır (bu ilin birinci yarısında ölkədə cəmi 99,5 mln. dollar dəyərində 46,7 min ton alümin istehsal edilib).

Buna görə, Bakıda aparılacaq danışıqların əsas mövzularından biri Azərbaycandan Tacikistan alüminin tranzit və Azərbaycandan Tacikistana giltorpaq ixracı həcminin artırılması olacaq", deyə Tacikistan hökumətindəki mənbə bildirib.

Onun sözlərinə görə, Tacikistan və Azərbaycan arasında ticarət dövriyyəsinin əsas hissəsini Azərbaycanın dəniz və dəmir yolları ilə Avropaya nəql edilən alümin təşkil edir. Tacikistan Azərbaycandan giltorpaq, koks və digər xammal növləri alır.

Ötən il üçün statistik məlumatlara görə, iki ölkə arasında qarşılıqlı ticarət dövriyyəsinin ümumi həcmi təxminən 13 mln. dollar təşkil edib.

Əməkdaşlığın müqavilə-hüquqi bazası ticari-iqtisadi, bank, vergi, mədəniyyət və investisya sahələrində 40-dan çox sazişlə möhkəmləndirilib. -02D-