Taleh Bağırzadənin həbs müddəti 2 ay uzadılıb

Nərimanov rayon məhkəməsinin hakimi Sevil Quliyeva bu gün qanunsuz narkotik saxlamaqda ittiham olunan ilahiyyatçı Taleh Bağırzadənin həbs müddətini iki ay uzadıb.

Vəkil Cavad Cavadovun Turan-a verdiyi məlumata görə, həbs müddəti Baş Prokurorluğun təqdimatı əsasında uzadılıb.

Vəkil həbs müddətinin uzadılmasını əsassız hesab edir. O, narkotik saxlamaq ittihamı üzrə ibtidai istintaqın yekunlaşması və işin məhkəməyə göndərilməsi haqqında vəsatət qaldırıb. Lakin vəsatət təmin edilməyib.

Məhkəmə zamanı Bağırzadə cümə xütbəsi ilə çıxış edərək, dindarların narkotik saxlamaq ittihamı ilə həbsini “Azərbaycan xalqına təhqir” kimi qiymətləndirib.

İlahiyyatçı Qafqaz Müsəlmanları İdarəsinin (QMİ) sədri, şeyx Paşazadəni iftara müxalifət nümayəndələrini dəvət etmədiyi üçün tənqid edib.

Dindarlardan ibarət böyük bir qrup Bağırzadəni dəstəkləmək üçün məhkəmə binasının qarşısına gəlib. Onlar “Allahu Əkbər!”, “Azadlıq!” şüarları səsləndiriblər.

* Bağırzadə martın 31-də saxlanılıb və ona qarşı 234.1-ci (qanunsuz narkotik saxlamaq) maddəsi ilə ittiham irəli sürülüb. Lakin Bağırzadənin həbsinin əsl səbəbi onun hakimiyyəti kəskin tənqid etdiyi xütbəsinin İnternetdə yayılması olub. 16D06-