Təşkilat sədrinin həbsdə vəfatı ölkəni qarışdıra bilər

İslam Partiyası (AİP) rəhbərliyi partiya üzvlərinin həbsləri və onlara münasibətlə bağlı bazar ertəsi öz ofisində mətbuat konfransı keçirib. 

Partiya Ali Məclisinin sədri Natiq Kərimov partiya sədri Mövsüm Səmədov başda olmaqla AİP-in 8 funksionerinin həbsdə, daha 5 üzvün isə istintaq altında olduğunu nəzərə çatdırıb. Bütünlükdə isə ölkə üzrə 90-dan çox dindarın həbsdə olduğu qeyd edilib. N.Kərimov AİP üzvlərinə qarşı irəli sürülən narkotik maddə saxlamaq, terror hazırlamaq, hakimiyyəti ələ keçirmək kimi ittihamları, bununla bağlı çıxarılan məhkəmə qərarlarını əsassız və absurd adlandırıb.  

N.Kərimov sədr müavini Vaqif Abdullayevin 2012-ci ildə həbsdə vəfatını xatırladaraq bu ölümü müəmmalı adlandırıb. Hazırda partiyanın həbsdə olan Astara rayon komitəsinin sədri Ruhulla Axundzadənin ölümlə üz-üzə qaldığı  nəzərə çatdırılıb. Mayın 10-da R.Axundzadənin ürək tutmaları kəskinləşib və Penitensiar Xidmətin müalicə mərkəzinə gətirilib. Partiya rəhbərliyi R.Axundzadə ilə görüş istəsə də Penitensiar Xidmət buna razılıq verməyib. Həbsə düşdüyü vaxtdan mütəmadi müalicə almalı ikən R.Axundzadə müalicədən məhrum olunub. Baxımsızlıq nəticəsində sağlıq durumu pisləşib, miokard infarktı keçirib.  Xüsusi nəzarət altında olmalı ikən saxlanma şəraiti əlverişli deyil, 15 nəfərlik bir itaqda saxlanılır. R.Axundzadə tibbi xidmət personalı ilə təmin olunmayıb, belə ki, istənilən hərəkət onun ölümünə səbəb ola bilər. 

Partiya rəhbərliyi belə münasibəti dindarlara qarşı qərəz və ayrı-seçkiliyin nümunəsi adlandırıb. AİP sədrinin müavini Akif Heydərli R.Axundzadənin ölkənin cənub bölgəsində böyük nüfuz sahibi olduğunu söyləyib. Bu şəxsin xəstəxanada ölümünün ölkədə sabiltiyin pozulmasına səbəb ola biləcəyi barədə xəbərdarlıq edib. Buna görə də tezliklə həbsdən azad olunmasını təklif edib. 

Partiyanın sədr əvəzi Elçin Manafov yaranan durumla bağlı dövlət başçısı İlham Əiliyevə müraciət ünvanlamağı təklif edib. Bu müraciət nəticə verməsə, kütləvi aksiya keçirmək məsələsini gündəmə gətirilməsi irəli sürülüb.

AİP sədri M.Səmədovun 2011-ci ildə həbsi, barəsində inzibati cəzasının çıxarılması, müvəqqəti təcridxanada saxlanmalı ikən “bandotdel”də saxlanması barədə sənədlər artıq Avropa məhkəməsinə daxil olub. 

Partiya rəhbərliyi üzvlərinin haqları uğrunda sona qədər mübarizə aparacağını bəyan edib.

Azərbaycanda 2010-cu ilin sonlarından “hicabı müdafiə” etirazları başlayıb. Bununla bağlı rəsmi Bakı həbslərə start verib. 2011-ci ilin yanvarından başlayan həbslər nəticəsində İslam Partiyasının 8 üzvü həbsə alınıb, daha 5 nəfərin işi istintaq altındadır. Ölkə üzrə  90 dindar həbsə alınılb.-05C-