Türk lirəsinin məzənnəsi kəskin şəkildə düşüb

Bakı/03.08.18/Turan: Avqustun 2-də Türk lirəsinin məzənnəsi psixoloji həddi - 1 ABD dolları - 5 lirə həddini keçib və düşməyə davam edib.

Valyuta birjasında hərracın sonuna doğru bir dollara artıq 5.08 lirə verirdilər.

Bir gün bundan əvvəl lirənin məzənnəsi 4.8 səviyyəsində olub.

Məzənnə ABŞ-ın Türkiyənin ədliyyə və daxili işlər nazirlərinə qarşı sanksiyalar tətbiq etməsindən sonra kəskin şəkildə düşüb.

Sanksiyaların səbəbi Ankaranın Fətullah Gülənlə əlaqələrdə ittiha etdiyi amerikalı pastor Endryu Bransonu azad etməkdən imtina etməsi olub.

Pastor 20 ildən çoxdur Türkiyədə yaşayır və o, 35 ilə qədər həbs oluna bilər, baxmayaraq ki, təqsirinin heç bir sübutu təqdim edilməyib.

Lirənin məzənnəsinin düşməsi Türkiyəni ənənəvi olaraq orada şoppinqlə məşğul olan xarici turistlər üçün cəlbedici edir.

İqtisadçı ekspertlər lirənin daha da ucuzlaşacağını proqnozlaşdırırlar, bu, ilk növbədə Erdoğan hökumətinin təxmin edilməsi mümkün olmayan iqtisadi siyasəti və xarici kapital üçün risklərin artması ilə bağlıdır. Türkiyədən xaricə investisiya axını əlverişsiz iqtisadi perspektivlərin daha bir göstəricisidir. -02D-