Ukrayna Rusiya ilə müharibədə tək qalıb

Vladimir Putinin Ukraynaya qarşı başlatdığı müharibənin ikinci günündə dövlətlərin Avropada yeni hərbi münaqişəyə münasibəti bəlli oldu. Hələlik birmənalı olaraq, prezident Vladimir Zelenskinin dediyi kimi, Ukrayna özünü təkbaşına müdafiə edir.

Azərbaycanın xarici işlər nazirinin müavini Araz Əzimov bildirib ki, Ukrayna və onun ətrafında vəziyyət ciddi narahatlıq doğurur. O qeyd edib ki, yaranmış vəziyyət beynəlxalq hüququn norma və prinsiplərinə, o cümlədən dövlətlərin suverenliyinə, ərazi bütövlüyünə, sərhədlərin pozulmazlığına hörmət və ATƏT məkanında təhlükəsizliyin bölünməzliyinə uyğun olaraq sülh və diplomatik yolla həll olunmalıdır.

Azərbaycan prezidenti İlham Əliyev Ukrayna müharibəsinə öz münasibətini bildirməyib.

Gözlənilmədən Gürcüstan antirusiya koalisiyasında iştirakdan imtina edib. Baş nazir İrakli Qaribaşvili bildirib ki, Gürcüstan Rusiyaya qarşı tətbiq edilən maliyyə və iqtisadi sanksiyalarda iştirak etmək niyyətində deyil. O belə izah edib ki, "bu qərar ölkəmizə və əhalimizə ancaq ziyan vuracaq. Bu qərar milli maraqların əsasında qəbul edilib".

Fevralın 25-i axşama qədər Ermənistan rəhbərliyinin timsalında bir nəfər də olsun Ukrayna müharibəsindən danışmayıb.

Cümə axşamı Türkiyə prezidenti Rəcəb Tayyib Ərdoğan bildirib ki, Ankara Rusiyanın Ukraynadakı əməliyyatını regional sabitliyə və sülhə “ağır zərbə” hesab edir və böhranın dialoq yolu ilə həllinə çağırır.

ABŞ prezidenti Co Bayden “əlavə güclü sanksiyalar və Rusiyaya ixrac edilə bilən şeylərə yeni məhdudiyyətlər” barədə bildirib. Dövlətlər Moskvanın dollar, funt sterlinq və yen ilə biznes aparmaq imkanlarını məhdudlaşdırmaq niyyətindədir.

Bundan əlavə, Bayden ABŞ-ın VTB də daxil olmaqla, dörd ən böyük bankı bloklayacağını bildirib. Lakin Bayden Rusiyanın SWIFT bank sistemindən ayrılmasına təşəbbüs göstərməkdən imtina edir ki, bu da, dünyada çoxlarının fikrincə, Rusiya üçün ən ağır, qeyri-hərbi cəza ola bilərdi. Bayden bu cəza üsulunu ehtiyatda saxlayıb.

Rusiyanın Ukraynadakı separatçı qurumları “dövlət” kimi tanıması ilə Almaniya federal hökuməti “Şimal axını 2” qaz kəmərinin sertifikatlaşdırılması prosesini “sonrakı xəbərdarlığa qədər” dayandırıb.

Müharibəyə baxmayaraq, Almaniya Ukrayna ordusuna öldürücü silahlar göndərməyəcək, - Almaniyanın iqtisadiyyat naziri Robert Habek bildirib. Ukraynanın Almaniyadakı səfiri ölkəyə silah tədarükü ilə bağlı köməklik göstərməyi xahiş edib.

Almaniyanın vitse-kansleri, iqtisadiyyat və iqlimin mühafizəsi naziri Robert Habek etiraf edib ki, Almaniya hazırda həqiqətən də Ukraynaya yardım göstərmək iqtidarında deyil.

Almaniya hökuməti üzvlərinin bəyanatları federal kansler Olaf Şoltsın nitqi ilə ziddiyyət təşkil edir. Belə ki, o, dünənki  günü “Ukrayna üçün dəhşətli, Avropa üçün isə kədərli gün” adlandırıb. Kanslerin sözlərinə görə, bu, “beynəlxalq hüququn açıq şəkildə pozulmasıdır”. Rusiyanın hücumuna “heç bir şeylə haqq qazandırmaq olmaz”, - o deyib. "Rusiya bu hərbi əməliyyatları dərhal dayandırmalıdır", - Şolts tələb edib. Onun sözlərinə görə, Almaniya Ukrayna və onun xalqı ilə həmrəydir.

Robert Habek Rusiya kömüründən və qazından imtinanın və təbii maye qaz üçün əlavə terminalların tikintisinin vacibliyini bildirib. Onun sözlərinə görə, Almaniya digər ölkələrdən daha böyük həcmdə qaz və kömür almağa məcbur olacaq, çünki ölkə “beynəlxalq hüququ pozan ölkədən bu qədər asılı ola bilməz”.

Fransa prezidenti Emmanuel Makron danışıqlar pəncərəsini açıq saxlamaq üçün V.Putinə zəng edən yeganə şəxsdir. Makron deyib ki, Fransa hazırda Rusiyanın hücumunu fəal şəkildə dəf edən Ukraynaya 300 milyon avro dəyərində maliyyə və hərbi yardım göstərməyə hazırdır.

Paris Avropa İttifaqının ardınca Rusiyaya qarşı öz sanksiyalarını tətbiq edəcək. Makronun sözlərinə görə, Parisin məhdudiyyətləri bir sıra Rusiya vətəndaşlarını da əhatə edəcək. Rusiyaya qarşı sanksiyalar daha sonra elan ediləcək.

Bundan öncə Avropa Parlamentinin sədri Roberta Metsola Avropa İttifaqını Rusiyaya qarşı “ən ciddi” sanksiyaları tətbiq etməyə çağırıb. Metsola qeyd edib ki, yeni sanksiyalar “təcili və ciddi olmalıdır, heç kim onlardan yayınmamalıdır”.

Avropa məkanında ən kəskin antirusiya ritorikasına baxmayaraq, Polşa Avropa İttifaqından ayrı olaraq Rusiyaya qarşı sanksiyalar tətbiq etməkdən imtina edib. Baş nazir Moravetskinin sözlərinə görə, ölkə iqtisadiyyatı Rusiya Federasiyasına qarşı öz sanksiyalarını tətbiq edəcək qədər güclü deyil.

Çexiya prezidenti Miloş Zeman Rusiyanın Ukraynadakı hərbi əməliyyatını pisləyib və Rusiyaya qarşı sərt sanksiyalara, o cümlədən Rusiya banklarının SWIFT-dən ayrılmasına çağırıb. Lakin dünyada bu cəza növü haqqında ümumi fikir yoxdur.

Çinin BMT-dəki səfiri Çjan Tsyun böhrana cəlb edilmiş bütün tərəfləri təmkinli olmağa və vəziyyətin gələcək eskalasiyasından çəkinməyə çağırıb. “Çin hesab edir ki, Ukrayna məsələsinin dinc yolla həlli üçün qapı tam bağlanmayıb və bağlanmamalıdır. “Hazırda Çin münaqişələrin kəskinləşməsinin qarşısını almaq üçün öz üslubu ilə sülhü və danışıqları təşviq etməyə davam edəcək”, - Çjan bildirib. Çinli diplomat qeyd edib ki,  Pekin  Ukrayna məsələsinin mürəkkəb tarixə malik olduğunu və vəziyyətin təkamülünün müxtəlif amillərin birgə hərəkətinin nəticəsi olduğunu dəfələrlə qeyd edib.

Avstraliyanın baş naziri Skott Morrison Pekinin bu siyasətini pisləyib. Morrison bildirib ki, Pekin Rusiyanı ittiham edən ölkələrə qoşulmalıdır. Onun sözlərinə görə,    Pekin Rusiyaya qarşı sanksiyalar tətbiq edən və onun əməllərini qınayan dünya ölkələrinə qoşulmalıdır. Avstraliyada hesab edirlər ki, Pekinin hərəkəti Rusiyaya qarşı sanksiyaların effektivliyini zəiflədir.

Fevralın 24-də Brüsseldə ekstren sammitdə Avropa İttifaqı ölkələrinin dövlət və hökumət başçıları Ukraynaya hərbi müdaxiləyə görə Rusiyaya qarşı ikinci geniş sanksiyalar paketini razılaşdırıblar. “Bu sanksiyalar maliyyə, enerji və nəqliyyat sektoruna, ikili təyinatlı mallara, eləcə də ixrac nəzarəti və ixrac maliyyələşdirilməsinə, viza siyasətinə, rusiyalı fiziki şəxslərin əlavə siyahılarına və sanksiyalar siyahısına daxil edilmənin yeni meyarlarına şamil edilir", - Avropa İtiifaqının Brüssel sammitinin yekunlarına dair bəyanatında bildirilir.

Avropa İttifaqı liderlərinin sözlərinə görə, yeni məhdudlaşdırıcı tədbirlər Rusiya üçün "genişmiqyaslı və ciddi nəticələrə” səbəb olacaq. Avropa Şurasının rəhbəri Şarl Mişel Tvitter  mikrobloqunda yekun sənədi açıqlayıb və yeni sanksiyalar paketini "Rusiyanın Ukraynaya qarşı heç bir şeylə təhrik edilməmiş və haqsız hərbi təcavüzünə" Brüsselin cavabı adlandırıb.-0