Vaşinqtonda meqalayihələrin maliyyələşdirilməsi üzrə beynəlxalq qurumların rolu haqqında dinləmələr

Vaşinqton/13.10.17/Turan: Cümə axşamı ətraf mühitin və insan hüquqlarının müdafiəsi ilə məşğul olan fəallar, habelə Azərbaycan vətəndaş cəmiyyətinin nümayəndələri qlobal maliyyə müəssisələrini ictimaiyyətin beynəlxalq qurumlar tərəfindən maliyyələşdirilən layihələrdən əldə olunan mənfəətə çıxışını təmin etmək üçün Bakıya təzyiqləri gücləndirməyə çağırıb. Bu barədə Turan-ın Vaşinqtondakı müxbiri məlumat verib.

İnsan hüquq və azadlıqlarının təmin edilməsi sahəsində ciddi problemlərlə əlaqədar Azərbaycanın Mədən Sənayesində Şəffaflıq Təşəbbüsünə üzvlüyü dayandırılıb.

Bununla belə, ötən ay Bakı beynəlxalq konsorsiumla ölkənin ən böyük neft yatağının 2050-ci ilə qədər işlənməsi ilə bağlı müqavilənin müddətini uzadıb və milyardlarla yeni investisiyalar əldə edəcək.

"Avtoritar rejimlər insan hüquqlarının pozulmasını davam etdirdikləri halda beynəlxalq qurumlardan maliyyə alması bir çox suallar doğurur", deyə Human Rights Watch-un nümayəndəsi Reyçel Denber bildirib.

Cənub Qaz Dəhlizinin Azərbaycanda korrupsiya və insan hüquqlarına təsiri haqqında dəyirmi masada çıxış edən Denber qeyd edib ki, bu çoxmilyardlıq meqalayihəyə beynəlxalq investisiyalar Azərbaycanda korrupsiya və insan hüquqlarının pozulmasına yol açır.

Onun fikrincə, bu cür layihələr yeri icmaların yoxsullaşmasına gətirib çıxarır və bərpa olunan enerji mənbələrinə vaxtında keçilməsinə mane olur".

Tədbir "Crude Accountability" və "International Accountability Project" təbiəti qoruma və hüquq müdafiə təşkilatları tərəfindən təşkil olunub.

İştirakçılar beynəlxalq maliyyə institutlarının səmərəli idarəetməyə necə yardım edə biləcəyi məsələsinə toxunublar.

Müzakirə iştirakçıları arasında iki Azərbaycan nümayəndəsi - iqtisadçı Qubad İbadoğlu və Müsavat Partiyasının sədr müavini Tofiq Yaqublu da var idi.

İbadoğlu qeyd edib ki, "Azəri-Çıraq-Günəşli" yatağının suyun dərinliyindəki hissəsinin işlənməsi müddətinin uzadılması haqqında müqavilənin imzalanmasından bir ay sonra belə sövdələşmənin məzmunu açıqlanmayıb.

Öz növbəsində, Yaqublu bildirib ki, uzun illər ərzində ölkənin vətəndaş cəmiyyəti və hüquq müdafiəçiləri daimi və artan təzyiq hiss edirlər.

Ədalətli seçkilərin olmaması, hər yeri bürüyən korrupsiya, genişmiqyaslı insan hüquqları pozuntuları ölkənin rəmzinə çevrilib. "Amma bu, beynəlxalq neft şirkətlərinin, maliyyə təşkilatlarının və Qərb demokratiyalarının avtoritar rejimi dəstəkləməsinə mane olmayıb", deyə o bildirib.

Reyçel Denber əlavə edib ki, hökumət yerli və beynəlxalq QHT-lərin bank hesablarını dondurub, vətəndaş cəmiyyətini şəffaflıq məsələləri ilə məşğul olmaq və xarici donorlarla işləmək imkanlarından məhrum etmək üçün QHT-lər haqqında qanunvericiliyi sərtləşdirib. -25B-