Yeni Azərbaycan Partiyasının deputatı Rusiya, Qərb və Ukraynanın eyni dərəcədə məsuliyyət daşıdığını bildirib

Bakı/28.02.22/Turan: Rusiyanın Ukraynaya hücumundan sonra Qərb ölkələri Rusiyaya və onun rəhbərliyinə qarşı sanksiyaları tədbiq edib. Hazırda həmin sanksiyaların siyahısı genişlənməkdədir.

Dünyanın əksər ölkələrində Ukraynaya dəstək mitinqləri keçirilir. Dünən belə bir aksiya Bakıda – Ukrayna səfirliyinin qarşısında baş tutub.

Dünən isə Rusiyanın prezidenti Vladimir Putin Rusiya nüvə qüvvələrini "xüsusi döyüş növbətçiliyi rejimi"nə gətirmək əmri verib. O, qərarını NATO rəhbərlininin "aqressiv bəyanatları"na cavab olduğunu deyib.

Bəs bütün bunların fonunda regionda demokratiya və demokratikləşmə prosesləri necə olacaq? Hazırda baş verən hadisələrin və onların nəticələrinin buna təsiri olacaqmı?

Milli Məclisin İnsan hüquqları Komitəsinin üzvü Elman Nəsirov Turan-a bildirib ki, Rusiya-Ukrayna və Rusiya-Qərb münasibətləri ilə bağlı irəli sürülən ssenarilər içərisindən ən pisi reallaşıb. "Bu gün Avropanın mərkəzində sözün həqiqi mənasında müharibə getməkdədir".

Deputatın fikrincə, müharibənin ciddi iqtisadi fəsadları ola bilər. "Rusiya dünyanın 6-cı iqtisadiyyatıdır və dünya iqtisadiyyatının tərkib hissəsidir. Rusiya iqtisadiyyatının çökmə prosesi dünya iqtisadiyyatına çox pis təsir edəcək. Çünki burada əlaqələr qarşılıqlı şəkildədir".

Komitə üzvü qeyd edib ki, hazırda gedən prosesləri dinc və danışıq yolu ilə həll etmək olardı. "Bu, baş vermədi. İndi gedən proseslərə görə də bütün tərəflər məsuliyyət daşıyır. Həm Rusiya, həm Ukrayna, həm də Qərbin üzərinə ciddi məsuliyyət düşür".

Nəsirovun fikrincə, proseslərin gedişatı göstərir ki, bir çox hallarda öz məqsədlərinə nail olmaq üçün demokratiyadan bir pərdə kimi istifadə edilir. "Amerika Birləşmiş Ştatlarında demokratiyadan çox danışırlar. Amma 1998-ci ildə NATO, ABŞ da başda olmaqla, Yugoslaviyada Slobodan Miloşeviç rejimini bombaladı. Ora da demokratiyanı gətirmək istəyirdi. Amma raketlərlə demokratiyanı gətirməkmi olur? 78 gün Yugoslaviya bombalandı, xeyli dinc insan həyatını itirdi".

Deputat qeyd edib ki, 2003-cü ildə BMT Təhlükəsizlik Şurasının heç bir qətnaməsi olmadan İraqda müharibə başlandı və nəticədə yüz minlərlə dinc əhalisi həlak olub. "Yenə də "raketlərlə İraqa demokratiyamı gətirildi?" sualı yaranır. İndi də Rusiya-Ukrayna müharibəsi və Rusiya-Qərb qarşıdurması fonunda da demokratiya faktiki olaraq dəf olunmuş vəziyyətinə düşür. Bütün çılpaqlığı ilə məlum olub ki, demokratiyadan böyük dövlətlər hansı məqsədlər üçün istifadə edir. Ölkənin daxili işlərinə müdaxilə etmək üçün insan hüquqları bir vasitəyə çevrilib".

O vurğulayıb ki, Azərbaycan dövlətinin mövqeyi onunla bağlıdır ki, bu münaqişə beynəlxalq hüquq normaları və dövlətlərin ərazi bütövlüyü çərçivəsində dinc yolu ilə öz həllini tapsın.

Hüquq müdafiəçisi Anar Məmmədli isə bildirib ki, hazırda milli təhlükəsizlik məsələsi, eyni zamanda Avropanın təhlükəsizliyi məsələsi hər şeydən vacibdir. "Eyni zamanda humanitar problemlər var. Bu məsələlərin aktuallığı digər məsələlərlə müqayisədə daha önəmlidir".

Lakin, onun fikrincə, Vladimir Putinin başlatdığı ekspansiya qeyri-demokratik rejimlərin nə dərəcədə təhlükəli olduğunu göstərib. "Həm də qonşularında olan demokratiya üçün təhlükəlidilər. Hazırda Rusiya bizim regionda olan kövrək demokratiyalar üçün təhlükədir".

Ekspert düşünür ki, hazırda Rusiyaya qarşı tətbiq olunmuş sanksiyalar təkcə Rusiyanın Ukraynanın işğalı cəhdinə görə yox, həm də Rusiyada Putinin törətdiyi antihumanist və antidemokratik repressiyalara görə zamanında tədbiq olunmalı idi. "Belə olan şəkildə Putin daha da arxayınlaşmaz, daha da öz hakimiyyətini genişləndirməzdi. Bu sanksiyalar müharibə kontekstində yox, sırf insan hüquqları, demokratiya məsələsində ağır şəkildə tədbiq edilməlidir". -06B-