Yerevan sağlam düşüncədən uzaqdır – Azərbaycan XİN

Bakı/05.03.21/Turan: “Azərbaycan Respublikasının Prezidentinin İqtisadi Əməkdaşlıq Təşkilatının bu ili martın 4-də keçirilən Zirvə görüşündə çıxışı zamanı bölgədə sülh və sabitliyin təmin edilməsi üçün yaranan əməkdaşlıq imkanlarından, birbaşa bölgə ölkələrinin faydalana biləcəyi nəqliyyat layihələrinin həyata keçirilməsindən danışdığı halda, Ermənistan Xarici İşlər Nazirliyinin (XİN) nümayəndəsinin Azərbaycanı beynəlxalq hüququ pozmaqda ittiham etməsi və bunu bölgə üçün təhdid kimi qiymətləndirməsi rəsmi Yerevanın sağlam məntiq və düşüncədən uzaq olduğunu növbəti dəfə açıq nümayiş etdirir. Azərbaycan tərəfinin hər zaman əməkdaşlıq və bölgənin tərəqqisi ilə bağlı mövqeyini pozucu şəkildə şərh edən Ermənistan tərəfinin hansı maraqlara xidmət etdiyi sual doğurur və ümumiyyətlə, bu ölkənin hələ də nə istədiyini müəyyən etmədiyini göstərir”. Bu barədə Azərbaycan XİN-in mətbuat katibi Leyla Abdullayeva Ermənistan XİN nümayəndəsinin 5 mart tarixli bəyanatını şərh edərkən bildirib.

Qeyd edək ki, Ermənistan XİN İlham Əliyevin çıxışını, xüsusən, “Azərbaycanın tarixi ərazisindən – Zəngəzurdan keçən nəqliyyat dəhlizindən” bəhs etməsini 10 noyabr tarixli üçtərəfli bəyanatın pozulması kimi qiymətləndirib.

“Zəngəzuru “Azərbaycanın tarixi ərazisi” adlandıran və uydurma “dəhlizə” istinad edən Azərbaycan prezidenti təxribat xarakterli bu bəyanatı ilə 9 noyabr və 11 yanvar tarixli üçtərəfli bəyanatların həyata keçirilməsini qəsdən pozur”, deyə Ermənistan XİN-in nümayəndəsi Anna Naqdalyan bildirib.

O, həmçinin qeyd edib ki, “Arsax xalqının öz müqəddəratını təyin etmək hüququnun həyata keçirilməsi və müharibənin nəticələrinin aradan qaldırılması nizamlanmanın əsas elementləridir”. -0-