Zelenskinin emosional müraciətindən sonra NATO liderləri Ukraynaya daha çox kömək etməyə razılaşıblar

Kiyev/24.03.22/UNIAN: Şimali Atlantika Müqaviləsi Təşkilatının baş katibi Yens Stoltenberq bəyan edib ki, NATO liderləri prezident Vladimir Zelenskinin müraciətindən sonra Ukraynaya yardım etmək barədə razılığa gəliblər.

UNİAN müxbirinin məlumatına görə, Stoltenberq bu barədə Alyans üzvü olan ölkələrin dövlət və hökumət başçılarının fövqəladə sammiti başa çatdıqdan sonra brifinqdə bildirib.

"Ukrayna xalqı cəsarətlə və qətiyyətlə müqavimət göstərir, öz azadlığı və gələcəyi uğrunda mübarizə aparır. Biz onların tərəfindəyik. Prezident Zelenski coşqulu nitqilə bizə müraciət etdi, göstərdikləri mühüm dəstəyə görə NATO müttəfiqlərinə təşəkkür etdi və daha çox hərbi yardımın həyati əhəmiyyət kəsb etdiyini vurğuladı ", - Stoltenberq deyib.

Onun sözlərinə görə, bu gün NATO liderləri Ukrayna üçün gələcək dəstəyi təmin etməyə və "Rusiya üçün görünməmiş qiymət biçməyə " razılıq veriblər.

O qeyd edib ki, müttəfiqlər Ukrayna Silahlı Qüvvələrini mühüm hərbi təchizat, o cümlədən tank əleyhinə və hava hücumundan müdafiə sistemlərliə, həmçinin pilotsuz aparatlarla komplektləşdirirlər. Onun sözlərinə görə, bu yardım artıq yüksək effektli olduğunu sübut edib. Həmçinin Alyans üzvü olan ölkələr əhəmiyyətli dərəcədə maliyyə və humanitar yardım göstərirlər.

"Bu gün biz Ukraynanın bioloji, kimyəvi, radiasiya və nüvə təhlükəsinə qarşı müdafiə olunmasına kömək etmək üçün daha çox işlər görməyə, o cümlədən  kibertəhlükəsizlik sahəsində yardım göstərməyə və avadanlıq təqdim etməyə razılaşdıq", - Stoltenberq vurğulayıb.

O açıqlama verib ki, bunlar təhlükələrin aşkarlanması və müdafiə üçün avadanlıqlar, tibbi yardım, eləcə də yoluxma hallarına peşəkar hazırlığın təminatı və  böhran şəraitində idarəetməni əhatə edə bilər.

"Biz Ukraynanın dəstəklənməsi üçün əlimizdən gələni etmək ovqatındayıq və mən bu gün yardım göstərilməsilə bağlı müttəfiqlərin etdikləri konkret təklifləri alqışlayıram”, - o əlavə edib.

Stoltenberq bildirib ki, NATO ölkələri Ukrayna prezidenti Vladimir Zelenskinin təkliflərini diqqətlə dinləyiblər.

O xatırladıb ki, Ukrayna öldürücü silahlar, düşmən təyyarələrini vurmağa və döyüş tanklarına hücum etməyə kömək edən müasir sistemlər, həmçinin bir çox digər yardım növləri alır.—0—