Azərbaycan sərhəddi

Deməli, hər dəfə Azərbaycan sərhəddindən keçəndə xüsusi münasibət göstərirlər.

Gömrüyü keçirəm, sərhəd xidmətinə yaxınlaşıram. Passportumu yoxlayan, adımı görən kimi harasa zəng edir.

Böyükləri gəlir, məni aparırlar gömrükdə bir də yoxlayıb buraxırlar.

Diskomfort ondadır ki, adətən arxanda növbədə adamlar olur, onlar da sənə görə ləngiyir.

Bəzən isə digər sərnişinlər adama sadəlövh suallar verir ki, "yəqin, adınızı kiminləsə səhv salıblar?"

Daha deyə bilmirsən ki, meydanlarda istiqlaliyyəti üçün gecələdiyim məmləkətdə siyasi cəhətdən "etibarsız" hesab edilirəm.

Nəyə görə? Çünki deyirəm ki, hökumət oğurlamasın, korrupsioner olmasın, seçki saxtalaşdırılmasın, hamı qanun qarşısında bərabər olsun, daha qanundan günahsızı cəzalandırıb, oğrunun-əyrinin cinayətlərini ört-basdır etmək üçün istifadə edilməsin.

Özü də kimdir bizə bu məhdudiyyətləri tətbiq edənlər? Biz istiqlaliyyət üçün meydanlarda yatanda, televizorlardan həmin istiqlaliyyətin əleyhinə danışanlar, o zaman bizi Sovet vətəninə xəyanətdə ittiham edənlər, istiqlaliyyətin əleyhinə səs verənlər. İndi vətənin varı-dövlətini talan edib, ora-bura daşıyanlar.

Bütün həyatım boyu prinsiplərlə yaşamışam. Məşğul olduğum işdə ən pis mütəxəssis olmamışam, məsuliyyətimi dərk etmişəm, korrupsiyaya qurşanmamışam, heç kimin qabağımda əyilməyini istəməmişəm, heç kimin qabağında da əyilməmişəm, hamıya bərabər gözlə baxmışam. Vicdanlı həyata da, siyasətə də inanıram və mümkün sayıram.

Bütün bunların əksi olanlar məni "siyasi cəhətdən etibarsız" sayır:)

Bəli, mənim korrupsionerlərə, rüşvətxorlara, seçki saxtlaşdlranlara, qanunları məhv edənlərə heç bir etibarım yoxdur, ola bilməz və olmayacaq da!