Bəxtiyar Hacıyevin Milli Məclisə müraciəti

Nəzərinizə çatdırıram ki, 07 noyabr 2010-cu ildə Azərbaycan Respublikasının Milli Məclisinə seçkilər zamanı 17 saylı Yasamal 3-cü seçki dairəsindən deputatlığa namizəd kimi qeydə alınmış, ölkədə qısa müddət olmağıma, namizədliyimin qeydiyyatı, təbliğat-təşviqat prosesi, müşahidəçilərimizin qeydiyyatı və müşahidənin aparılması və digər mərhələlərdə yaradılmış süni əngəllərə baxmayaraq, rəsmi nəticələrə görə seçki marafonunu 14 namizəd arasında 3-cü sırada tamamladım. Rəsmi nəticələrə görə bu dairədən ən çox səs toplamış birinci və ikinci namizədin hər ikisinin seçki qərargahlarının məşhur "karusel" əməliyyatından istifadə etdiklərini(bu barədə sübutlar və şikayət ərizəsi Avropa İnsan Hüquqları Məhkəməsinə təqdim edilmək üçün hazırlanır) nəzərə alaraq, azad, şəffaf və ədalətli seçkilər keçiriləcəyi halda, bu məktubda yazılan məsələləri 17 saylı Yasamal 3-cü seçki dairəsinin kölgə deputatı kimi yox, 17 saylı Yasamal 3-cü seçki dairəsinin millət vəkili olaraq Milli Məclisdə qaldırardım.

Heç kimə sirr deyil ki, qanunlarımızda olan bəzi boşluqlar, ziddiyətlər bəzi qurumlara bu boşluqlardan ustalıqla istifadə edərək vətəndaşlara təzyiq etməyə, onları öz təbii hüquqlarını əldə etmək üçün rüşvət verməyə məcbur etməyə əsas verir. Məsələn, 22 dekabr 2006-cı ildə qüvvəyə minmiş "Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında" Azərbaycan Respublikasinin Qanununun 3.2-ci maddəsində göstərilir ki, Azərbaycan Respublikasında hərbi xidmətə çağırışın əsasları haqqında" Azərbaycan Respublikasının Qanununun "q" bəndində "əyani formada təhsil alan" sözləri "əyani formada ali təhsilin birinci - bakalavr (ali tibbi təhsil üçün, o cümlədən internatura) pilləsində təhsil alan " sözləri ilə əvəz edilsin və 18-35 yaşlarında kişi cinsindən olan vətəndaşlara təhsil ilə bağlı yalnız bir dəfə, bakalavr pilləsində təhsil almaq üçün möhlət verilsin. Amma Azərbaycanda yüz minlərlə olmasa da, on minlərlə şəxs 2006-cı ildən sonra bakalavr pilləsindən birbaşa magistratura pilləsinə, magistraturadan aspirantura və doktorantura pilləsinə birbaşa keçid etmişlər. Hətta müxtəlif dövlət qurumları tərəfindən maliyyələşən müxtəlif dövlət proqramları vasitəsi ilə təhsil alan gənclər arasında da, Təhsil Nazirliyinin icra etdiyi, Azərbaycan Prezidenti yanında Təhsil Komissiyasının işlərinə baxdıqları tələbələr arasında da çoxsaylı belə hallar var. Bu da heç kimə sirr deyil ki, müxtəlif rayonların hərbi komissarlıqları təhsilini davam etdirməyə görə, işi vəya ailə vəziyyəti ilə bağlı olaraq həqiqi hərbi xidmət keçmək istəməyən şəxslərə müxtəlif yollarla "yararsız" statusu verir, bu vətəndaşlar 35 yaşları tamam olana qədər hərbi komissarlıqların nəzarətləri altında qalırlar və qanundakı boşluqlar müxtəlif şəxslərin bu vəziyyətdən istifadə edərək "Vətənə borcu" müxtəlif zamanlarda, müxtəlif məbləğlər qarşılığında ödənməsini təşkil etməsinə imkan yaradır. Hər dəfə "Azərbaycan Respublikasında hərbi xidmətə çağırışın əsasları haqqında" Azərbaycan Respublikasının Qanununun əlavə və düzəlişlərin edilməsi təklif ediləndə, yaxud Azərbaycan Respublikası Konstitusiyasının 76.2-ci maddəsində göstərilən alternativ xidmət məsələsi gündəmə gələndə bəzi millət vəkilləri Azərbaycanın müharibə şəraitində olduğunu əsas gətirərək bu məsələnin müzakirəsinə ehtiyac olmadığını bildirirlər. Lakin, reallıq bundan ibarətdir ki, qanunlardakı boşluqlar heç də Azərbaycan ordusunun güclənməsinə xidmət etmir, əksinə çoxsaylı "yararsız" statusu almış hərbi xidmətə yararlı vətəndaşlar ordusu yaradır, təhsil almaq istəyən şəxslərin qarşısı alınır, həqiqi hərbi xidmət keçməyən şəxslərə qanundakı boşluqlar vasitəsi ilə təzyiqlər etmək imkanı yaradır. Halbuki, istər alternativ xidmət, istərsə də təhsili, işi və ailə vəziyyətinə görə qısa müddət, ödənişli, intensiv həqiqi hərbi xidmət keçmək istəyənlərə şərait yaradılsa, çoxsaylı qeyri-peşəkar sıravi əsgərlərdən ibarət ordunun əvəzinə daha kompakt, maddi vəziyyəti daha yaxşı təmin edilmiş professional zabit və əsgərlərdən ibarət ordu yaratmaq olar. Bu zaman Türkiyə praktikasından istifadə etmək olar və ödənişli əsaslarla müəyyən şəxslərə 2 aylıq intensiv hərbi təlimlərin keçildiyi ödənişli həqiqi hərbi xidmət imkanı yaradıla bilər. Bu isə rüşvətlə "həqiqi hərbi xidmətə yararsız" statusu alan şəxslərin həqiqi hərbi xidmət keçməsinə, təməl hərbi biliklərə yiyələnməsinə, rüşvət olaraq müxtəlif qurumlara ödənilən məbləğin qanuni qaydada Azərbaycan Silahlı Qüvvələrinin büdcəsinə köçürülməsinə gətirib çıxara bilər. Bütün bunları nəzərə alaraq təklif edirəm: 1) "Azərbaycan Respublikasında hərbi xidmətə çağırışın əsasları haqqında" Azərbaycan Respublikasının Qanununun əlavə və düzəlişlərin edilməsi üçün Milli Məclis müzakirələrə başlasın. 2) Azərbaycan Konstitusiyasının 76.2-ci maddəsində göstərilən hallarda alternativ xidmət keçmək ilə bağlı mexanizm hazırlansın. 3) Təhsili, işi və ailə vəziyyətinə görə qısa müddətli ödənişli, intensiv həqiqi hərbi xidmət keçmək məsələsi Milli Məclisdə müzakirə edilsin və bunun mexanizmi hazırlansın.

Bəxtiyar Hacıyev, Azərbaycan Respublikasının vətəndaşı