Bir daha MTN haqqında

Milli Şuranın sədri, Professor Cəmil Həsənli:

Dostlar! 2006-ci ildən başlayaraq Nazirlər Kabinetinin tərkibində Milli Təhlükəsizlik Nazirliyi adında orqanın olmasını konstitusiyaya zidd hesab edib fikirlərimi mətbuatda bildirmişəm. Sonuncu dəfə 2015-ci ilin mart ayının 30-da, yəni təxminən 6 ay bundan öncə “Azadlıq” qəzetində dərc edilmiş bir müsahibəmdə MTN bağlı fikirlərimi, ümumiyyətlə hökumətin tərkibində bu adda nazirliyin saxlanmasının yolverilməz olduğunu bildirmişdim. İndi görürəm Eldar Mahmudov nazir vəzifəsindən azad edildikdən sonra çoxlarının dili açılıb. Mənim 30 mart və 4 avqust 2015-ci il tarixli, habelə ondan əvvəlki müsahibələrimdə MTN-lə bağlı irəli sürdüyüm təklifləri bəziləri öz adından səsləndirməyə başlayıb. Buyurun həmin müsahibənin kiçik bir hissəsi ilə aşağıda tanış ola bilərsiniz.

Cəmil Həsənli :“Bütün xalq analoqu olmayan ümummilli rüşvət ödəyicisinə çevrilib” (“AZADLIQ” 30 mart 2015-ci il)

- Siz hüquq-mühafizə və təhlükəsizlik orqanlarında da islahatlara toxundunuz. Bu islahatları necə təsəvvür edirsiz?
- Söhbət ölkənin təhlükəsizliyinin etibarlı təminatından gedir. Ümumiyyətlə, hökumətin tərkibində Milli Təhlükəsizlik Nazirliyinin olması nə dərəcədə məqsədəuyğundur? Məsələn, niyə ABŞ, Britaniya, Türkiyə, hətta Rusiya kimi böyük ölkələrin hökumətlərinin tərkibində belə bir nazirlik yoxdur? Stalinin ölümündən sonra totalitar dayaqlar üzərində dayanan Sovet rəhbərliyi belə, hökumətin tərkibində olan Dövlət Təhlükəsizlik Nazirliyini kabinetin yanında, məhz tərkibində yox, yanında Dövlət Təhlükəsizliyi Komitəsinə (nazirliyinə yox, məhz komitəsinə) çevirdi. Hökumətin tərkibində olub, içində olduğun hökumətə təhlükəsizlik meyarları ilə göz qoymaq ciddi uyğunsuzluqlar yaradır. Digər mühüm məsələ kəşfiyyat və əks kəşfiyyat xidmətini yerinə yetirən bir orqanın nazirlik statusunda fəaliyyət göstərməsinin əsaslı bir izahının olmamasıdır. Mütəşəkkil cinayətkarlığa qarşı mübarizə adı altında Daxili Işlər Nazirliyindəki bütün idarə və istiqamətlər eynilə MTN-də təkrarlanır. Dövlətin təhlükəsizliyi paralel strukturların yaradılması üzərində yox, daha möhkəm dayaqlar üzərində qurulmalıdır. Təsəvvür edin, bizim MTN həm müstəsna dərəcədə məxfi xarakter daşıyan kəşfiyyat və əks kəşfiyyat xidmətini yerinə yetirir, həm hər həftə bir neçə kiloqram narkotik tutması barədə məlumat yayır, həm də iqtisadi cinayətkarlığa qarşı mübarizə aparmalı olur. Əgər MTN narkotik qaçaqmalçılığına qarşı mübarizə aparırsa, onda Daxili Işlər Nazirliyinin müvafiq idarəsi nə üçündür? Əgər nazirliyin müvafiq strukturları idarə olunan müxalifət partiyaları yaratmaq, profil və “facebook” səhifələri ələ keçirmək, vətəndaşın cibinə və evinə narkotik, silah atmaq, yataq otağına gizli kamera yerləşdirməklə məşğuldursa, deməli, bütövlükdə təhlükəsizlik konsepsiyası qüsurludur. Ciddi bir təhlükəsizlik orqanı siyasi mülahizələrlə jurnalist həbsinə, qabaqcıl gəncləri təqib etməyə, heç bir təsir imkanı olmayan mənasız saytlar yaradıb onu idarə etməyə vaxt itirirsə, torpaqlarımızın 20 ildən artıq işğal altında qalmasına təəccüblənmək lazım deyil.