Cəmil Həsənli: Ən böyük rəzaləti İlham Əliyev özü törədib

Dövlət başçısı İlham Əliyev fevralın 5-də regionlarının sosial-iqtisadi inkişafı dövlət proqramlarının icrasına həsr olunmuş konfransda çıxışı zamanı müxalifətin ünvanına bir sıra ittihamlar səsləndirib. 

Son prezident seçkisini müxalifətin sonu adlandıran İ.Əliyev demokratik düşərgəni xarici qüvvələrə işləməkdə ittiham edib: “Bizim daxili vəziyyətimiz çox sabitdir, sabitlik qorunur, sabitliyi qoruyan əsas şərt xalqla iqtidar arasındakı birlikdir, xalqın gördüyümüz işlərə dəstəyi, inamıdır. Budur sabitliyi şərtləndirən əsas amil. Daxili vəziyyət sabitdir. Xaricdən olan bəzi təzyiqlər, görürsünüz ki, heç bir səmərə vermir. Bəzi satılmış müxalifət qruplarının fəaliyyəti heç bir səmərə vermir. Ayağımıza dolaşmaq istəyənlər yenə də rəzil olurlar. Son prezident seçkiləri də bunu göstərdi. Xalqın böyük əksəriyyəti onların çirkin kampaniyasına uymadı. Xalq reallığa, inandığı adama səs verdi. Ona görə, xaricdən ianə alan, vicdanını xaricilərə satan ünsürlərə Azərbaycan siyasətində yer yoxdur. Bunu son seçkilər də göstərdi. Son seçkilər müxalifətin sonu idi. Bu, onların rəzalət zirvəsi idi”.

İ.Əliyevin səsləndirdiyi fikirlərə Milli Şura sədri Cəmil Həsənli münasibət ifadə edib. O deyib ki, İ.Əliyev müxalifətin sonu anonsunu dəfələrlə verib. Lakin bunlardan heç biri düz çıxmayıb. “İndi isə onun öz sonu yaxınlaşır. Ötən dekabrdan başlayaraq 30-35 gün ərzində onun rəhbərlik etdiyi ölkədə 26 vətəndaş özünü yandırmağa çəhd edib, bunun 6-sı ölümlə nəticələnib. İ.Əliyev ədalətsizliklə üzləşən vətəndaşların özünə od vurub yandırmasına münasibət bildirsəydi daha yaxşı olardı. Müharibə qazisinin özünü yandırdığı bir məmləkətin başçısının yekə-yekə danışmağa haqqı yoxdur. İ.Əliyev rus dilli olduğu üçün görünür rəzalət sözünün mənasını o qədər yaxşı bilmir. Millətin gözündə rəzil olmaq sərgərdan bir xalqdan mənimsənilmiş vəsait hesabına Dubayda azyaşlı övladına 75 milyon dollarlıq villalar almaqdır. Rəzalətin nədən ibarət olduğu Virjin adalarında aşkarlanan sərvətlərdən bəllidir. Ən böyük rəzalət özünü xalqın “prezidenti” hesab edən bir şəxsin ölkənin gəlirli sahələrini (məsələn, Çovdar qızıl mədənlərini, telefon kampaniyalarını, nəqliyyat , bank və sair sahələri) öz yaxın adamlarının adlarına keçirməsidir. Ən böyük rəzalət ölkə qanunverici orqanında deputat mandatlarının pulla satılmasıdır ki, iki ilə yaxındr bütün dünya İ.Əliyev iqtidarının bu rəzaləti barədə danışır, ən mötəbər hesabatlarda bu barədə yazılır. 2013-cü ilin prezident seçkilərinə gəldikdə həmin seçkilərdə rəzil olan müxalifət yox, İ.Əliyev özü idi. Seçki sənədlərində gəlir və mülkiyyəti barədə bəyannaməni Azərbaycan xalqından gizli saxlayan müxalifət yox, İ.Əliyev idi. Ən böyük rəzalət ölkədəki seçkilərin nəticələrinin seçki günündən bir gün əvvəl aşkarlanaraq dünyanın satirik proqramlarının gündəminə düşməsi, ölkənin beynəlxalq aləmdə rüsvay edilməsi idi. Bütün bu rüsvayçılıqlardan sonra ayrı yerlərdə rəzalət axtarmaq özü rəzillikdir. Ölkəni aşağılayıb onun xalqından və beynəlxalq ictimaiyyətdən gizlin tələm-tələsik ailə inaqurasiyası keçirmək idi rəzalət. Ötən prezident seçkilərində İlham Əliyevin xalq arasında heç bir dəstəyinin olmadığını bütün millət, bütn dünya gördü. 2013-cü il seçkiləri İ.Əliyevin seçki saxtakarlığının rəzalət zirvəsi idi. Son prezident seçkiləri bir daha göstərdi ki, İ.Əliyevin xalqı arasında heç bir dayağı yoxdur. O, ölkədə hakimiyyəti mənimsəyərək zorakı üsullarla, polis rejimi yaratmaqla əlində saxlamaq istəyir. Azərbaycan xalqı İ.Əliyevə səs verməyib. O, xalqın səsi ilə deyil, nəzarətində olan MSK-nın arayışı ilə “prezident” olub. Elan olunan 85% xalqın səsi yox, MSK-nın saxta rəqəmləri idi. Əgər İ.Əliyev bunu xalqın etimadı kimi qəbul edirsə, deməli ölkədən xəbəri yoxdur. İ.Əliyev bu yol ilə hakimiyyəti mənimsəyib. Azərbaycanda 9 oktyabr prezident seçkilərini  müşahidə etməyə rəsmi mandatı olan yeganə təşkilat ATƏT-in Varşava bürosu idi. Həmin büro ilkin və yekun rəyində 9 oktyabr seçkilərində saxtakarlığın səviyyəsinin 58% olduğunu təsbit etdi. Qalan müşahidəçilərin çoxu “kürü diplomatiyası”nın fəal diplomatları, rejimin muzdlu lobbi qruplarının əlaltıları idilər. Rəsmi mandatı olan nüfuzlu bir qurumun 58% saxta çıxartdığı bir seçkini xalqın dəstəyi kimi təfsir etmək “analoqsuz rəzalətin” azərbaycansayağı təzahürüdür. Avropa məkanına daxil olan hansı normal ölkədə belə bir rəy elan olunsydı, həmin gün seçkilərin nəticələri ləğv edilər, yeni prezident seçkiləri keçirilərdi”. 

C.Həsənli əlavə edib ki, İ.Əliyevin qeyd edilən çıxışı əsəblərinin yerində olmamasının göstəricisidir. Dünən Misirdə, Liviyada, Tunisdə, bugün Suriyada və Ukraynada cərayan edənlər diktator rejimlərinin əsəblərini korlayıb. 

“Biz ölkənin Şimali Koreya müstəbidliyinə yönlənməsinə yol verə bilmərik. Azərbaycan Avropa Birliyi ilə assosiativ sazişə getməlidir və gedəcək, Azərbaycan Ümumdünya Ticarət Təşkilatının üzvü olmalıdır və olacaq. Nə İlham Əliyev, nə də bir başqası ölkəni bu ümumdünya prosesindən kənarda saxlaya bilməz”. -05B-