Fransada Azərbaycanın dostları varmı?

Fransada ictimai rəyin ermənipərəst olduğu sirr deyil. 2020-ci il müharibəsindən sonra bu əhval-ruhiyyə daha da güclənib, hazırda isə ən yüksək nöqtəyə çatıb. KİV-də, xüsusilə telekanallarda tez-tez Bakıya qarşı tənqid və sanksiya çağırışları səslənir.

Fransa prezidentinin, XİN başçısının və Fransa parlamentinin bəyanatları Azərbaycanın mənfi imicini formalaşdırır və bu, böyük Fransa şirkətlərinin Azərbaycandakı maraqlarına baxmayaraq baş verir. 

Buna görə alternativ rəy və ya sadəcə olaraq vəziyyətin obyektiv qiymətləndirilməsi Fransa ictimai rəyinə meydan oxumaq kimi görünür. Bu, cəsarət tələb edir. Lakin belə insanlar, az da olsa, var.

Elza Vidalın Fransa televiziyasındakı çıxışını dinləyin və oxuyun. O, təkbaşına Azərbaycanı soyqırımda və etnik təmizləmələrdə ittiham edən ekspertlər qrupunu və teleaparıcını susdurub. 

Hazırda Elza RFI-nin - Radio Frans İnternational-ın rus bölməsinə rəhbərlik edir. Buna qədər o, Azərbaycan hakimiyyətinin "ermənipərəst" adlandırdığı "Sərhədsiz Reportyorlar" təşkilatında Şərqi Avropa və MDB ölkələri bölməsinə rəhbərlik edib. 

Onun bir həftə əvvəl Fransanın 5-ci telekanalında tok-şoudakı çıxışından bəzi tezisləri təqdim edirik:

"Ərazi butövlüyünü pozan ölkə Ermənistandır, çünki birinci müharibə dövründə Ermənistan sadəcə Qarabağı deyil, eyni zamanda ətrafdakı 7 rayonu da ələ keçirmişdi. Azərbaycanlılar torpaqlarından qovulmuşdu, bir daha xatırladıram ki, 500 mindən çox azərbaycanlı öz evindən qovulmuşdu. O halda soyqırım haqqında danışanda ehtiyatlı olaq. Həmçinin, qanunsuz işğal, müharibələr, şiddətli təcavüz haqda hadisələrdə Ermənistanın da payı var".

"Orada deyilik, bilmirik nə baş verir. Doğrudur, keçmişdə də dəhşətli sui-istifadələr olub, amma demək istədiyim odur ki, əgər paralel aparsaq, ərazi butövlüyü üçün mübarizə apardığımız Ukraynadakı eyni prinsipi BMT Azərbaycan üçün tətbiq edib.

Buna əlavə olaraq, birinci Qarabağ müharibəsi 94-də başa çatıb, o zaman təxminən 520 min azərbaycanlı qaçqın oldu. BMT-nin Azərbaycanın xeyrinə 4 qətnaməsi var, çünki bu, onun ərazi butövlüyüdür".

"Əslində keçmişdə çoxlu sülh cəhdləri olub, Ermənistan prezidenti olub ki, sülh bağlamaq istədiyi üçün vəzifəsindən uzaqlasdırılıb".

"Bu muzakirədə deyilməyən bir məsələ var - Ermənistanda bölgələr var idi ki, tamamilə azərbaycanlılardan ibarət olub. Azərbaycan da iddialar irəli sürə bilər". -0-