Insan hüquqlari klubunun bəyanatı

Etiraz aksiyalrıi ərəfəsində həbslər cəmiyyət üçün neqativ nəticələr yaradir.Müxalif fikirli şəxslərə qarşi açiq ayri-seçkilik nümayiş etdirilir

İnsan Hüquqları Klubu (İHK) aprelin 2-də mitinq keçirmək istəyən müxalif qüvvələrin üzvlərinin və tərəfdarlarının müxtəlif sutkalara həbsə atılmalarını qəti şəkildə pisləyir və bunu təsadüfi deyil, eyni mərkəzdən idarə edilən vahid göstərişlər əsasında aparıldığını bəyan edir. İHK eyni zamanda hakimiyyəti dəstəkləyən qruplara etirazlarını bildirmək üçün şərait yaratdığı halda, müxalif qrupların sərbəst toplaşmaq və fikrini ifadə etmək azadlığını pozduğu üçün icra strukturlarını və polisi qınayır.

Yerli KİV-nin və aprelin 2-də keçiriləcək mitinqin təşkilatçısı olan İctimai Palatanın verdiyi məlumatlara görə, martın 29-dan etibarən mitinqdə iştirakı gözlənilən 20-a yaxın şəxs polis tərəfindən saxlanılmış və onların əksəriyyəti inzibati həbs cəzasına məruz qalmışlar. Martın 31-də və aprelin 1-də hakimiyyəti dəstəkləyən şüarlarla çıxış edən bir qrup gənc müxalifətdə olan Azərbaycan Xalq Cəbhəsi Partiyasının sədri Əli Kərimlinin qarşısında ona etiraz əlaməti olaraq aksiya keçirib. Aksiyaya polis müdaxiləsi olmayıb.

İHK hesab edir ki, 2 aprel mitinqində iştirakı gözlənilən şəxslərin həbsi Azərbaycanda sərbəst toplaşmaq azadlığının pozulmasını və ölkədə qanunun aliliyinin tamamilə tapdalanmasını göstərən amildir. Belə ki, preventiv xarakter daşıyan bu həbslər bütün normativ-hüquqi aktlarla qadağan edilib. Həbslər əvəzinə, insanların sərbəst toplaşaraq fikirlərini bildirmələri üçün şərait yaradılmalıdır. Bu addım Azərbaycanın beynəlxalq imicinin artırılmasına və üzvü olduğu beynəlxalq təşkilatların qarşısında götürdüyü öhdəliklərin yerinə yetirilməsinə yardım göstərə bilər. İHK bəyan edir ki, hakimiyyəti dəstəkləyən qruplar tərəfindən təşkil edilən aksiyalarda olduğu kimi müxalif qüvvələr tərəfindən təşkil edilən aksiyalara da polis müdaxiləsi olmamalıdır.

İHK bəyan edir ki, hakimiyyətin nümayiş etdirdiyi bu mövqe onların başqa cür düşünən şəxslərə qarşı dözümsüzlüyünün göstəricisidir. Bunun nəticəsində Azərbaycanın insan haqları sahəsində üzərinə götürdüyü öhdəliklərə riayət edilmir, insan hüquq və əsas azadlıqları kobus surətdə pozulur.

İHK Azərbaycan hakimiyyətindən bu tip həbsləri dərhal dayandırmağı və bütün siyasi tərəflərin ayrı-seçklik qoyulmadan sərbəst toplaşmaq azadlığını təmin etməyi tələb edir. İHK beynəlxalq ictimaiyyəti Azərbaycan hakimiyyətindən insan hüquqlarının müdafiəsi sahəsində üzərinə götürdüyü öhdəliklərə riayət etməyə, xüsusilə sərbəst toplaşmaq, fikir azadlığı kimi hüquqlarının təmin edilməsini tələb etməyə, əks təqdirdə hakimiyyətə qarşı sanksiyaların tətbiq edilməsi üçün səy göstərməyə çağırır. .

*İnsan Hüquqları Klubu 2010-cu il dekabrın 10-da bir neçə hüquq müdafiəçisi (İdrak Abbasov, Emin Hüseynov, Səbuhi Qafarov, Rəsul Cəfərov, Zöhrab İsmayılov, Natiq Cəfərli, və s.) tərəfindən yaradılan hüquq müdafiə təşkilatıdır.