Qeyri-Hökumət Təşkilatlarının nümayəndələrinin Azərbaycan RespublikasınınPrezidenti İlham Əliyevə...

İnsan Hüquqları Klubunun və Siyasi Azadlıqları Müdafiə Alyansını təşəbbüsü ilə müxtəlif xəstəliklərdən əziyyət çəkən və hazırda həbsdə olan ictimai-siyasi fəallarla bağlı bir qrup Qeyri- Hökumət Təşkilatlarının nümayəndələri oktyabrın 23-də Azərbaycan Respublikasının Prezidenti İlham Əliyev müraciət ediblər.

Müraciətdə bildirilir: 

Cənab Prezident, diqqətinizə çatdırmaq istəyirik ki, yerli və beynəlxalq hüquq müdafiə təşkilatları ölkədə siyasi məhbus məsələsi ilə bağlı monitorinqlər, araşdırmalar aparır və bu problemin aradan qaldırılması ilə bağlı təklif və tövsiyələr irəli sürür. Hazırda Azərbaycan Cəzaçəkmə Müəssisələrində yerli və beynəlxalq hüquq müdafiə təşkilatları tərəfindən vicdan və siyasi məhbus hesab edilən şəxslər var. Həmin şəxslərin bir neçəsinin səhhətində isə ciddi problemlər var və onların belə bir durumda Çəzaçəkmə Müəssisələrində saxlanılması xoşagəlməz hallarla nəticələnə bilər.

Cənab Prezident, təəssüflə nəzərinizə çatdırmaq istəyirik ki, belə hadisələr baş verib. Belə ki, Azərbaycan Respublikası (AR) Cinayət Məcəlləsinin (CM) 28, 214.2.1, 28, 214.2.3, 228.3 və 278-ci maddələri üzrə təqsirli bilinən və Bakı Ağır Cinayətlər Məhkəməsinin 7 oktyabr 2011- ci il tarixli hökmü ilə 11 il müddətinə azadlıqdan məhrum edilən Azərbaycan İslam Partiyasının sədr müavini Vaqif Abdullayev səhhətində yaranan problemlərlə bağlı bu ilin iyul ayının 12- də saxlanıldığı Azərbaycan Respublikası Ədliyyə Nazirliyinin Penitensiar Xidmətinin Müalicə Müəssisəsində vəfat edib.

Onun qan xərçəngi xəstəliyindən əziyyət çəkdiyi bildirilirdi. AR CM- nin 234.1-ci maddəsi ilə təqsirli bilinərək məhkəmə qərarı ilə 1 il azadlıqdan məhrum edilən dindar Füzuli Novruzov da səhhətində yaranan problemlərlə bağlı bu ilin avqust ayının 15-də Ədliyyə Nazirliyinin Penitensiar Xidmətinin 16 saylı Cəzaçəkmə Müəssisəsində ölüb.

Onun kəskin ürək-damar çatışmazlığından vəfat etdiyi bildirilir. Bu üzücü hadisələrdən sonra belə hadisələrin bir daha baş verməməsi üçün müxtəlif xəstəliklərdən əziyyət çəkən və hazırda həbsdə olan ictimai-siyasi fəallarla bağlı Sizə müraciət etmək qərarına gəldik. Belə ki, AR CM-nin 132-ci, 159.4.1-ci və 160.2.1-ci maddələri ilə təqsirləndirilərək Göyçay Rayon Məhkəməsinin hökmü ilə 3 il azadlıqdan məhrum edilən hüquq müdafiəçisi Vidadi İsgəndərov şəkərli diabet, AR CM-nin 228.1-ci maddəsi ilə təqsirləndirilərək Şəmkir Rayon Məhkəməsinin hökmü ilə 2 il müddətinə azadlıqdan məhrum edilən Azərbaycan Xalq Cəbhəsi Partiyasının Rəyasət Heyətinin üzvü Şahin Həsənli ürək və bel ağrılarından, AR CM-nin 221.3-cü maddəsi ilə ittiham edilərək Nəsimi Rayon Məhkəməsinin hökmü ilə 6 il müddətinə azadlıqdan məhrum edilən Azərbaycan Milli Dövlətçilik Partiyasının sədri Nemət Pənahlı şəkərli diabet və böyrək, AR CM-nin 178.3.1 və 178.3.2-ci maddələri ilə təqsirləndirilərək barəsində məhkəmə qərarı ilə həbs-qətimkan tədbiri seçilən “Texnikabank”ın Yasamal filialının sabiq müdir müavini Elnur Seyidov dağınıq skleroz, AR CM-nin 179.3.2-cü, 306.2-ci, 308-ci, 311- ci, 313-cü və digər maddələrlə ittiham olunaraq Ağır Cinayətlərə Dair İşlər üzrə Azərbaycan Respublikası Məhkəməsinin hökmü ilə 11 il azadlıqdan məhrum edilən sabiq səhiyyə naziri Əli İnsanov onurğa sütunundakı yırtıqdan, AR CM-nin 274-cü, 283.2.2-ci və 234.4.3-cü maddələri ilə təqsirləndirilək barəsində məhkəmənin qərarı ilə həbs-qətimkan tədbiri seçilən riyaziyyatçı alim, hüquq müdafiəçisi, "Tolışi Sədo" qəzetinin baş redaktoru Hilal Məmmədov astma (ağır formasından), Cinayət Məcəlləsinin 179.3.1-ci, 192.2.1-ci, 206.4-cü, 213-cü, 308.2- ci, 311.3.1-ci, 313.3.2-ci və digər maddələri ilə ittiham olunaraq Ağır Cinayətlərə Dair İşlər üzrə Azərbaycan Respublikası Məhkəməsinin hökmü ilə 11 il azadlıqdan məhrum edilən sabiq iqtisadi inkişaf naziri Fərhad Əliyev ürək-damar xəstəliklərindən əziyyət çəkirlər.

Son zamanlar adları çəkilən bu şəxslərin səhhətlərindəki problemlər daha da çoxalıb. Qeyd etmək istəyirik ki, Azərbaycan Respublikası Cəzaların İcrası Məcəlləsinin 167-ci maddəsi məhkumların xəstəliyə görə cəza çəkməkdən azad edilmə hüququnu nəzərdə tutur.

Bundan əlavə, Azərbaycanın ratifikasiya etdiyi bir sıra beynəlxalq-hüquqi sənədlərdə, xüsusilə isə İstənilən növ saxlama və həbs altında olan bütün şəxslərin Müdafiəsi üzrə Prinsiplərdə və BMT- nin Məhkumların Müalicəsi üzrə Minimum Standart Qaydalarında məhkumların xəstəliklərinə görə azadlığa buraxılması hüququ təsbit edilmişdir. Hesab edirik ki, adları çəkilən məhkumların işlərinə xəstəliklərinə görə yenidən baxılması və onların azadlığa çıxması Azərbaycanın insan hüquqları sahəsində beynəlxalq imicinin güclənməsinə səbəb olacaq. Bu səbəbdən də cənab Prezident yuxarıda adları çəkilən şəxslərin səhhətlərində yaranan problemlərin artması ilə bağlı səlahiyyətlərinizdən istifadə edərək onların azadlığa buraxılması üçün müvafiq göstərişlər verməyinizi Sizdən xahiş edirik.

Müraciəti İnsan Haqları Monitorinq Qrupunun üzvü Novella Cəfəroğlu, Seçkilərin Monitorinqi və Demokratiyanın Tədrisi Mərkəzinin icraçı direktoru Bəşir Süleymanlı, İnsan Hüquqları Klubunun sədri Rəsul Cəfərov, Reportiyorların Azadlığı və Təhlükəsizliyi İnstitutunun rəhbəri Emin Hüseynov, Beynəlxalq İnsan Hüquqları Cəmiyyətinin Azərbaycan Milli bölməsinin rəhbəri Səadət Bənənyarlı, İnsan Hüquqları və Qanunçuluğun Müdafiəsi Bürosunun rəhbəri Səidə Qocamanlı, Helsinki Vətəndaş Assambleyasının Azərbaycan Milli Komitəsinin sədri Arzu Abdullayeva, İnsan Hüquqları üzrə Maarifləndirmə İctimai Birliyinin rəhbəri İradə Cavadova, Azadlığın və Sülhün Müdafiəsi Beynəlxalq Hüquq Təşkilatının sədri Mətləb Mütəllimli, Siyasi Azadlıqları Müdafiə Alyansının koordinatoru Samir Kazımlı, “Demokratiyanı Öyrənmə” İctimai Birliyinin sədr müavini Vüqar Hüseynov, "Hüquq və İnkişaf" İctimai Birliyinin sədri Hafiz Həsənov, "Siyasi Məhbuslarsız Azərbaycan" İctimai Alyansının koordinatoru Oqtay Gülalıyev imzalayıblar.