QHT təmsilçiləri rəsmi Bakını öhdəliklərini yerinə yetirməməkdə ittiham edirlər

Azərbaycanda fəaliyyət göstərən Vətəndaş Cəmiyyətinin təmsilçiləri “Kamil Vətəndaş" Maarifləndirmə Mərkəzinin rəhbəri Həsən Hüseynlinin həbsinə etiraz olaraq birgə bəyanat yayıblar.

Müəlliflər H.Hüseynliyə qarşı ittihamları uydurma adlandırır, və dərhal azadlığa buraxılmasını tələb edirlər.

57 yaşlı H. Hüseynli martın 31-də saat 18:00 radələrində başqasına bıçaq xəsarəti yetirmək iddiası ilə xuliqanlıqda ittiham olunaraq şübhəli şəxs qismində saxlanılıb. 

Müəlliflər Gəncədə fəaliyyət göstərən “Kamil Vətəndaş” Maarifləndirmə Mərkəzini ölkənin qərbində insan haqları və demokratiyanın təşviqi, gənclərin maarifləndirilməsi və xaricdə təhsil proqramlarında iştiraka yönələn proqramların həyata kecirilməsi ilə tanındığını vurğulayırlar. Mərkəzin beynəlxalq və yerli ictimai qurumlarla birgə 20-dən artıq lahiyə icra etdiyi qeyd olunur.

Bu fəaliyyətinə görə Gəncə Şəhər İcra Hakimiyyətinin Mərkəzə və rəhbəri H.Hüseynliyə qarşı təzyiq kampaniyası həyata keçirdiyi nəzərə çatdırılır.

Azərbaycanın bir çox regionlarında olduğu kimi burada da QHT-lərin fəaliyyətinə maneələr yaradıldığı, əhali ilə işləməyə, qapalı yerlərdə belə tədbirlər keçirməyə imkan verilmədiyi vurğulanır. Amma bu təzyiqlərə baxmayaraq, Mərkəzin QHT həmkarları üçün resurs mərkəzi qismində çıxış etdiyi, layihələrə dəstək verdiyi və məhz buna görə cəzalandırıldığı iddia edilir.

H.Hüseynlinin həbsi jurnalist Qənimət Zahidin, blogerlər Emin Milli və Adnan Hacızadənin həbslərilə müqayisə edilir. Belə saxta ittihamla jurnalist Sərdar Əlibəyli və siyasi fəal  Yadiqar Sadiqovun da həbsxanada olduğu xatıradılır.

H.Hüseynlinin həbsi keçən ilin sonundan müstəqil QHT-lərə qarşı başlanan  repressiyasının tərkib hissəsi adlandırılır. Repressiyaların digər sübutu kimi iki həftə öncə iqtidarın siyasi sifarişi əsasında vətəndaş cəmiyətinin fəalları   İlqar Məmmədov və Tofiq Yaqublunun həbsləri göstərilir.

Vətəndaş cəmiyyətinin tanınmış nümayəndələrinin saxta  ittihamlarla həbsləri,  qanunvericiliyin sərtləşdirilməsilə təqiblərin artması insan haqları üzrə beynəlxalq konvensiyaların tələblərinin pozulması, Azərbaycanın Avropa Şurası və AŞPA önündə götürdüyü öhdəliklərin pozması kimi dəyərləndirilir.

Azərbaycanın AŞ Nazirlər Komitəsində sədrliyinə iki aydan da az bir müddət qaldığı vaxtda belə həbsin baş verməsi Azərbaycan iqtidarının fundamental insan hüquq və azadlıqlarını qorumaqda maraqlı olmaması kimi şərh edilir.

Son olaraq təmsilçilər ölkə iqtidarını H.Hüseynlini və saxta iitihamlarla həbsə alınan bütün vətəndaş cəmiyyəti fəallarını azad etməyə, insan haqlarına  hörmətlə yanaşmağa və beynəlxalq öhdəlikləri yerinə yetirməyə çağırırlar.-05D-