Şəxsi nəzarət altında

Quliyeva 21 noyabr 2019-cu il tarixində Dondar Quşçu kəndində yoxa çıxıb. Yanvarın 6-da elə həmin kənddə onun yanmış cəsədi tapılıb. Yanvarın 10-da 47 yaşlı Süleymanov saxlanılıb.

Ona qarşı CM-in 120.2.9 (köməksiz vəziyyətdə olan şəxsi öldürmə) və 145.2.3-cü (yetkinlik yaşına çatmamış şəxsi azadlıqdan məhrum etmə) maddələri ilə ittiham irəli sürülüb. Süleymanovu 145.2.3-cü maddə ilə 3 ildən 5 ilədək azadlıqdan məhrumetmə, 120.2.9-cu maddə ilə 14 ildən 20 ilə qədər və ya ömürlük həbs cəzası gözləyir.

İlkin Süleymanov yanvarın 24-də Apellyasiya Məhkəməsində bildirib ki, oğurlama və qətl haqqında etiraf ifadələrini işgəncə altında verib.

Vəkil Əlibaba Rzayev Apellyasiya Məhkəməsində bildirib ki, Süleymanovun bədənində zorakılıq izləri var. Vəkil məhkəmənin işgəncə və digər prosessual pozuntularla bağlı ayrıca qərar qəbul etməsi barədə vəsatət qaldırıb və bunun araşdırılması üçün Prokurorluğa təqdimat verib. Amma məhkəmə vəsatəti və şikayəti təmin etməyib.

Öz növbəsində, Baş Prokurorluq vəkilin işgəncə haqqında bəyanatın təkzib edib. Baş Prokurorluğun məlumatına görə, Süleymanov 1 saylı Bakı İstintaq Təcridxanasına daxil olarkən müayinə olunub və onun bədənində zorakılıq izləri olmayıb.

Amma bir müddət əvvəl Süleymanovun bacısı və atası İlkinə işgəncə verilmiş ola bilər və onun ifadəsi başqa xətlə yazılıb.

Dövlət başçısı Tovuzda 10 yaşlı Nərmin Quliyevanın öldürülməsi haqqında işin araşdırılmasını şəxsi nəzarəti altına götürüb, bu barədə yanvarın 9-da keçirilən operativ müşavirədə baş prokuror Zakir Qaralov bildirib.

Heydər Əliyevin şəxsi nəzarəti

1979-cu il yayın əvvəllərində Azərbaycan Kommunist Partiyasının Mərkəzi Komitəsinin birinci katibi Heydər Əliyevin hökumət bağ evinin postunda duran milisə hücum olub. Qatil Zaqulba çimərliyi ilə hökumət bağ evinin sərhədində olan posta yaxınlaşıb və arxadan milisin başına armaturla zərbə endirib. Milis güclü insan imiş, bundan sonra belə müqavimət göstərməyə çalışıb, amma daha bir zərbə alaraq, huşunu itirib. Cinayətkar onun cinayətin hədəfi olan tapançasını götürüb və qaçıb gizlənib.

İşi Heydər Əliyev şəxsi nəzarəti altına götürüb.

Hüquq-mühafizə orqanlarının bütün mümkün qüvvələri axtarışa cəlb edilib. Milis qəsəbədə yaşayan çox sayda insanı sorğuya tutub və dindirib. Hər ehtimala qarşı üç oğlan həbs edilib. Onlara işgəncə verilib və hər biri ayrı-ayrılıqda törədilmiş əməli etiraf etməyə məcbur edilib. Onlardan biri əsas təqsirləndirilən şəxs, digər ikisi isə əsas şəxsin başına nə isə gəlsə, hər ehtimala qarşı ehtiyatda olan təqsirləndirilən şəxs idi.

Amma real cinayətkar tapıldı. O, Rusiyaya köçüb KQB-nin Sibirdə zabiti kimi xidmət göstərən, sonradan vəzifədən azad edilən qəsəbə sakini idi. Anasına qonaq gəlmişdi. Elə həmin vaxt planlaşdırdığı cinayəti törədərək, Rusiyaya qayıdıb.

O, saxlanıldıqdan sonra əməlini etiraf edib, tapançanı basdırdığı yeri göstərib. Tapança cinayət yeri yaxınlığında tapılaraq müsadirə edilib. Sağ qalan milis cinayətkarı tanıyıb.

Bu hadisə həbs edilən üç oğlan və onların ailələri üçün xoşbəxt son idi.  Final fərqli ola bilməzdi, çünki iş Heydər Əliyevin nəzarəti altında idi.

Amma elə bu hadisə sovet milisinin ənənələrinin gözəl nümunəsidir, Sovet İttifaqının dəfnindən sonra belə bu ənənələr aradan qaldırılmayıb. Narkotik saxlama, xuliqanlıq və s. ittihamlarla işlərin necə saxtalaşdırıldığının şahidiyik.

İlkin Süleymanov həqiqətən təqsirlidir? Kənd sakinləri "Yox" deyirlərsə, cəmiyyət onun təqsirli olmağına  inana bilərmi? Bu insanların mövqeyi hamı üçün, xüsusən də Nərmin Quliyevanın işi şəxsi nəzarəti altında olan şəxs üçün siqnal olmalıdır.