Tanınmış jurnalist Şahvələd Çobanoğlunun təqib edilməsinə qarşı Milli Şuranın etiraz BƏYANATI
Milli Şurasının Koordinasiya Mərkəzi fevral ayının 28-də keçirdiyi toplantısında fikir və düşüncəsinə görə jurnalistlərin, ictimai fəalların təqib edilməsin, onların saxta ittihamlarla həbs edilməsin pisləmişdir. Son vaxtlar belə təqiblərə məruz qalanlardan biri də tanınmış jurnalist Şahvələd Çobanoğludur. Şəhvələd bəy ilk növbədə Milli Şuranın rəhbər heyətinə daxil olan, onun siyasətini müəyyən edən şəxslərdən biridir. Hazırda Milli Şuranın 8 nəfər üzvü həbsdədir və onların içərisində qurumun Koordinasiya Mərkəzində təmsil olunan Leyla xanım Yunus da vardır. Yarandığı gündən bəri Milli Şuraya qarşı başlamış təqib dalğası Şahvələd bəydən də yan keçmədi. İctimai fəalların başlıca ittiham maddəsinə çevrilmiş vergi yoxlaması maddəsi onun da başının üzərinə aldı. Digərlərində fərqli olaraq Şahvələd bəyin son 7 ildəki vergi fəaliyyətini məhkəməni hökmü ilə yoxlamağa qərar veriblər. Niyə? Çünki ölkənin qanunvericiliyində vergi ödəyicisinin yalnız son 3 ildəki fəaliyyəti yoxlanıla bilər. İlkin baxış zamanı görünür Şahvələd bəyin son 3 ildəki fəaliyyətində bir şey aşkarlanmadığı üçün hüquq mühafizə orqanları bir az dərinə gedib, məhz məhkəmə qərarı ilə Şahvələd bəyin üzərində vergi linçlənməsi həyata keçirmişdir. Azərbaycan hakimiyyəti son illərdə o qədər “humanistləşib” ki, sözün tam mənasında iti xəncər əvəzinə, pambıqla baş kəsir. Leyla xanım, Anar Məmmədli, İntiqam bəy, Rəsul Cəfərov, Bəşir Süleymanlı və digərləri hazırda gizli polis funksiyasını yerinə yetirən Vergi nazirliyinin ittihamları əsasında mühakimə olunub və olunmaqdadırlar. Hətta, siçan dərmanının vaxtı keçdikdən sonra Xədicə xanımın işi də vergi “yayınmasına” transfer edildi. İndi də Şahvələd bəy bu yoxlama ilə təhdid edilir. Bütün dünyada qanunlar humanizm prinsiplərinə uyğunlaşdırıldığı halda Azərbaycanın korrupsiya bataqlığına yuvarlanmış avtoritar hakimiyyəti müxtəlif bəhanələrlə daha çox adam tutmaqdan zövq alır. Dünyanın tendensiyası belədir: vergidən yayınma varsa onu ödətdirir, mənimsəmə varsa həmin vəsaiti mənimsənilən yerə qaytartdırır. Daha belə şeylərə görə adam tutmurlar. Axı bu adamlar hər kvartal, hər il vergi hesabatları veriblər, əgər yayınma halları varsa, niyə müvafiq orqanlar tərəfindən vaxtında xəbərdarlıq etməyiblər. Bunlar hamısı bəhanədir. Şahvələd bəyi vergidən yayınmaya görə yox, “Azad düşüncə” dərgisin buraxıb bu ölkədə azad düşüncə yaratmağa cəhd etdiyinə görə təqib edirlər. O, kamil jurnalist təhsili almış, müxtəlif mətbuat orqanlarında cilalanmış peşəkar bir qələm əhlidir. Sözü eşidilən, qələmi etibar qazanmış jurnalistdir Şahvələd bəy. Onun bir qələm əhli kimi formalaşması müstəqillik dövrünün jurnalistika tarixidir. XX əsrin əvvəllərində yaşayıb yaratmış varislərinin “Qələmin müqəddəs vəzifəsi millətə xidmətdən keçir” vəsiyyətini hər zaman içində daşıyır. Yazıları ilə, çox şaxəli fəaliyyəti ilə nümunə yaradır Şahvələd bəy: vətənə xidmət, milləti ayıltmaq nümunəsi, haqqa tapınmaq, öz prinsiplərinə hörmət örnəyi. Qələmin qiymətini yaltaqlıq meyarları ilə müəyyən edən bir hakimiyyətə belələri qorxulu yuxu kimi görünür. Şahvələd bəyin qəflətən vergi orqanlarının yuxusuna girməsi də məhz bunlarla bağlıdır. Biz Milli Şura olaraq namuslu adamların, öz sözü, qələmi və intellekti ilə millətə xidmət edən adamların təqib edilməsi, onların vergi orqanlarının əli ilə cəzalandırılmasın pisləyirik, siyasi sifariş əsasında azad düşüncəsinə görə jurnalistin təqib olunmasın məhkum edirik, siyasi əqidəsinə görə mətbuat işçisinin təhdid edilməsini demokratik prinsiplərə zidd hesab edir, Şahvələd bəyin təqib edilməsin Milli Şuraya qarşı aparılan repressiyaların növbəti dalğası kimi qiymətləndiririk.
Rəy yaz