Təbliğat müharibəsi real döyüş əməliyyatlarını kölgədə qoydu

İyulun ortalarında Ermənistan-Azərbaycan sərhəddində sərhəd yüksəklikləri ətrafında lokal döyüşlər dayandı, lakin təbliğat müharibəsi vüsət alır. Hər iki tərəf öz cəmiyyətlərinə döyüşlərin nəticələrini əlverişli şəkildə təqdim etməyin vacibliyini dərk edir. Bu zaman hadisələrin şərhi real vəziyyətdən daha yuxarıda olur.

Bu baxımdan, Ermənistanın baş naziri Paşinyanın iyulun 23-də keçirilən toplantıdakı nitqini göstərmək olar. O 12-16 iyul döyüşlərini yalnız hərbi deyil, həm də Ermənistan ordusunun mənəvi-psixoloji qələbəsi kimi qiymətləndirir.

O, sərhəd yüksəkliklərinin taleyilə bağlı sualdan məharətlə yan keçir və bildirir ki,  Azərbaycan onları ələ keçirməyə çalışdı, lakin qarşısı alındı. Azərbaycan yeni silah növləri və şəxsi heyətdə ciddi itkilər verib, erməni qoşunları pilotsuz uçuş aparatlarına və radio-elektron mübarizəyə qarşı yeni mübarizə vasitələrindən istifadə edib, beynəlxalq ictimaiyyət Azərbaycanın Metsamor AES-i darmadağın etmək təhlükəsini pisləyib, 2016-cı il aprel dərsləri hədər getməyib və indi danışıqlar zamanı şərtləri Ermənistan diqtə edəcək.

Erməni tərəfinin bu cür davranışı təəccüblü deyil, lakin Azərbaycan tərəfindən təbliğatın təşkili ilə bağlı əsaslı suallar var.

Biz hələ də aşağıdakı suallara cavab almamışıq: 12 iyulda nə baş verdi? Azərbaycanlı  hərbçilərin olduğu UAZ necə və harada atəşə tutuldu? General başda olmaqla yüksək rütbəli zabitlər növbəti gün niyə həlak oldular? Niyə bizə xəritədə döyüşlərin getdiyi yüksəkliklər göstərilmir? Müdafiə Nazirliyi rəhbərliyinin bildirdiyi kimi həlak olmuş 100-dən artıq erməni haradadır?

Bizim rəsmi və yarırəsmi şəxslərin çıxışlarını dinləyərkən belə təəssürat yaranır ki, onların əsas vəzifəsi bütün bu məsələlərdən yan keçməkdir.

Qeyd etmək lazımdır ki, 2016-cı ilin aprelindən fərqli olaraq, erməni tərəfi əvvəlcədən öz təbliğat addımlarını hazırlayıb. Bu, təkcə döyüşlərin şərhində deyil, nəticələrin şərhində də özünü göstərdi. Belə ki, UAZ-ın Ermənistan ərazisinə “keçməsi” və onun azərbaycanlı hərbçilər tərəfindən tərk edilməsi və sonra onların yenidən geri qayıtmaq istəməsi haqda bəyanat sonradan cəfəng görünürdü.

Əgər Azərbaycan tərəfi xəritədə hər şeyi göstərsəydi, ermənilərin, sadəcə, hərbçilərin olduğu avtomobili atəşə tutduğunu və postlardan birini tutduğunu etiraf etsəydi, hər şey öz yerinə düşmüş olardı.

Yüksək rütbəli hərbçilərin ön cəbhəyə göndərilməsi də suallar doğurur. Hərbi ekspertlərə inansaq, generalın ön cəbhəyə göndərilməsi yolverilməzdir. Birliyin qərargah rəisi əmr verməli və döyüşləri koordinasiya etməlidir. Eyni şey artilleriya rəhbərinə də aiddir.

Onlar və onların nəqliyyat vasitəsi məhz harada, hansı silah növündən vurulub?

Biz bu suallara cavab axtararkən ermənilər bütün dünyaya səs saldılar ki, “Qaraqaya”nı alıblar və Azərbaycan ərazisinin 20 km. dərinliyini nəzərdən keçirirlər.

Bu yüksəklik geri alınarkə baş verənlərin sevinci Müdafiə Nazirliyinin bəyanatında hiss olunurdu ki, ermənilər yüksəkliyi götürməyiblər və bütün bunlar yalandır.

Əgər götürməyiblərsə, niyə dörd hərbçi UAZ-da atışə tutulub, nə üçün daha dörd baş zabit həlak olub, daha sonra əsgərlər?

Müasir müharibə əsasən düşmənin dezinformasiyası və dezoriyentasiyası üzərində qurulur. Burada təşəbbüs hərbi hücumdan az rol oynamır.

Bu yaxınlarda baş verən hadisələrdən belə nəticə çıxarmaq olar ki, erməni tərəfi buna hazırlaşırdı və onun ev tədarükü olub. Bunun ermənilərin nəyinə lazım olması isə başqa məsələdir, ancaq Paşinyanın bugünkü bəyanatı buna müəyyən cavab verir.

Bir sıra rusiyalı analitiklər hesab edirlər ki, Paşinyanın hakimiyyətə gəlməsindən sonra hakimiyyəti möhkəmləndirmək üçün vaxt lazım idi və o, Yerevanın danışıqlarda mövqeyinin yumşalmasını imitasiya edirdi. Paşinyana hakimiyyəti möhkəmləndirməyə vaxt verməklə Bakı cəbhədə qələbə qazanmaq şansını əldən verdi.

İndi isə erməni tərəfi yenidən təmas xəttində ATƏT-in gücləndirilmiş monitorinq sisteminin yaradılması tələbini ön plana çəkir ki, Bakı çoxdan bunun əlyhinədir.

O da məlum oldu ki, Azərbaycan Müdafiə Nazirliyi təbliğat işini yenidən qurmalı, buna təhlükəsizlik, sosial şəbəkələr və dezinformasiya sahəsində analitiklərin timsalında ciddi mütəxəssislər cəlb etməlidir.

Əgər hərbi kəşfiyyat xidməti İnternetin erməni seqmentini diqqətlə izləsəydi, tanınmış erməni hərbçinin müsahibəsini gözdən qaçırmazdı.  Bir neçə ay öncə o demişdi: “Movses kəndi ətrafındakı yüksəkliyi götürmək lazımdır. Nə zaman? Qoy, Müdafiə Nazirliyi həll etsin”.

Bizim hərbçilər hərbi-siyasi dezinformasiya sahəsində mütəxəssisin Ermənistan Baş Qərargah rəisinin müşaviri təyin edilməsini də gözdən qaçırmamalıydılar.

Tovuz döyüşlərindən çıxarmalı olduğumuz əsas nəticə o olmalıdır ki, dünya ictimaiyyəti təkcə AzTV-nin tamaşaçılarından ibarət deyil.-0-